མིག་ཆུ་ལྷུང་བའི་སྔ་རྗེས་སུ།

རྣོ་སྦྲེང་།

མིག་ཆུའི་ཐིགས་པ་ཡོལ་རས་ཀྱི་ཁུགས་ལ་ལྷུང་སོང
ཁྲག་ཟེར་བའི་བུ་མོ་ཞིག་ས་ཡོམ་གྱི་གས་གར་སིམ་སོང
སྐྲ་ལོ་གཟེངས་ཞིང་མིག་ཟུང་དམར་ནག་ཏུ་གྱུར་བའི་བུ་ཆུང་ཞིག་གིས
ང་ལ་ཨ་ཕ་དགོས ང་ལ་ཨ་མ་དགོས་ཞེས
མི་ཚོགས་ཀྱི་གསེབ་ན་སྐྱོ་གདུང་གི་ཟློས་གར་འཁྲབ

ངུ་སྐད་ཀྱི་འབོད་པ་འཛམ་གླིང་གི་སྒང་གཞུང་ལ་ཁྱབ་སོང
སྐྱོབ་ཅེས་པའི་ཐ་སྙད་ཀྱིས་སྨྱན་བྱེད་ཀྱི་ཕྱི་ནང་བཀང་སོང
རྐང་བ་ཡ་གཅིག་འཕྲོག་སོང་བའི་བུད་མེད་ཅིག་གིས
ངའི་རྒད་པོ་གང་ན་ཡོད ངའི་གཅེས་ཕྲུག་གང་ན་ཡོད་ཅེས
སྨན་ཁང་ཕྱི་ནང་ན་རིག་རིག་ཀུན་ལ་འདྲི

མིག་འབྱེད་བཙུམ་གྱི་ཡུན་ལ
ཁྱེད་ཀྱི་ཚེ་སྲོག་སྒུལ་བ་ནས
བདག་གི་སེམས་པ་སྒུལ་བའི་བར་གྱི་མྱོང་སྣང་རེ་རེས
རེས་གསལ་རེས་མོག་གི་མི་ཚེའི་ཤོག་བུའི་སྟེང་ལ
ང་ཚོས་རི་མོ་ཅི་ཞིག་འབྲི་འོས སྙུག་ཁ་ཅི་ལྟར་བསྐོར་འོས