མགོ་བཅགས་ཀླད་རྡིབ།

4.14སྐྱེ་དགུའི་ས་ཡོམ་ཁྲོད་འདས་པའི་སྤུན་ཟླ་རྣམས་ལ་སེམས་ཁོང་ནས་མྱ་ངན་ཞུ།
མོག་ཆུང་བསོད་ཁོ།

སྤྱི་ཟླ་བཞི་བའི་ཚེས་པ་བཅུ་བཞི་སྟེ།།
ཉི་ཟླ་གཟའ་སྐར་ནག་པའི་ཞོགས་པ་དེ།།
སྲིད་པའི་འཁོར་ལོ་སྐལ་བརྒྱའི་མཐར་སླེབས་ཀྱང༌།།
ཕྱི་རབས་མི་ཡིས་ཅི་ལྟར་བརྗེད་པར་ངེས།།

དཀོན་མཆོག་གསུམ་གྱི་ཐུགས་ནས་ཀློད་འདྲ་བའི།།
མི་འདོད་དུས་མིན་འཆི་བའི་འཇིག་པ་ཞིག།
རྨི་ལམ་མ་ཡིན་ད་ནི་མངོན་སུམ་གྱིས།།
ཉམས་ཆུང་སྐྱེ་དགུ་བ་ཡི་སྟེང་ལ་བབས།།

ཆུ་ཚོད་བདུན་དང་སྐར་མ་ཞེ་དགུའི་སྟེང༌།།
ཚད་རིམ་བདུན་ཚེག་གཅིག་གི་ས་ཡོམ་དེས།།
ཚེ་སྲོག་མང་པོ་ཞགས་སྒྲོན་སྣུམ་ཚད་བཞིན།།
སྐད་ཅིག་ཉིད་ལ་སྣང་བའི་ཡུལ་ལས་སྟོངས།།

རྡོ་དང་ཨར་འདམ་ཉིལ་པའི་བར་གསེང་ན།།
མགོ་བཅགས་ཀླད་རྡིབ་ཅན་གྱི་བེམ་པོ་དང༌།།
བཟོད་མེད་ཟུག་གཟེར་ཅན་པའི་རྨས་མ་ཡི།།
སྲོག་སྐྱོབ་མིག་ཟུང་ཅེར་བའི་ཚུལ་འདི་སྡུག།

མ་ཤི་མངོན་སུམ་དམྱལ་བར་ཕྱིན་པ་སྟེ།།
མི་འདོད་རྐྱེན་ལས་ཐར་བའི་བྱིས་པ་འགའ།།
ཕ་མའི་བེམ་པོར་འཐམ་ཏེ་ངུ་ཞིང་འབོད།།
ད་དུང་གསོན་པར་རེ་བའི་ཚུལ་འདི་སྡུག།

བདག་གི་བུ་དང་བདག་གི་ཕ་མ་ཞེས།།
ངུ་སྔངས་དང་བཅས་ས་རྡོ་ཕར་སློག་ན།།
ཤ་རྡུང་རུས་ཆག་བྱས་པའི་བེམ་པོ་རེ།།
འདྲེན་བྱེད་ཡུལ་དུ་འགྱུར་བའི་ཚུལ་འདི་སྡུག།

མདང་ནུབ་ད་དུང་དགའ་དགའ་སྤྲོ་སྤྲོའི་ངང༌།།
གཞིས་ཁྱིམ་གཅིག་ལ་འཛོམས་པའི་མིང་སྲིང་དག།
སེ་གོལ་གཅིག་གི་ཡུན་ལ་འཆི་བདག་གིས།།
འདི་ཕྱི་གཉིས་སུ་དབྱེ་བའི་ཚུལ་འདི་སྡུག།

བུ་ཕྲུག་བོར་བའི་ཕ་མའི་ལག་བརྟེན་ཆག།
ཕ་མ་བསད་པའི་བུ་ཡི་མིག་ཆུ་སྐམ།།
ཁྱོ་ཀ་བསད་པའི་ཡུགས་སའི་མགྲིན་པ་བརྣངས།།
རང་བྱུང་གནོད་འཚེ་སུ་ཡིས་ལྡོག་པར་ནུས༌།།

མ་རུང་འཆི་བདག་གཞན་དུ་ཕྱིན་ཡང་རུང༌།།
བུ་ཕྲུག་བསད་པའི་ཕ་མར་སེམས་གསོ་དང༌།།
ཕ་མ་འདས་པའི་བུ་ལ་གཉོར་སྐྱོང་སོགས།།
དཀའ་བའི་ལས་དེ་ད་ནི་སུ་ཡིས་བྱེད།།

འཇིག་བརྟེན་འགྲོ་བ་མི་ཡི་ཚེ་སྲོག་དང༌།།
དངོས་སྣང་ཕུན་ཚོགས་རྒྱུ་ཡི་འབྱོར་བ་འདི།།
བྱིས་པ་བསམ་མེད་ཞིག་གི་རྩེད་རའམ།།
ལྟོག་བཏགས་ལྷ་སྒྲུང་ཞིག་དང་ཅིའི་མི་འདྲ།།

དེ་སྔའི་གླུ་དང་གར་གྱི་ཞིང་ཁམས་འདིར།།
ད་ནི་གཉེན་ཉེ་བོར་བའི་ངུ་སྐད་དང༌།།
ཀླད་ཆག་ལོང་རྡིབ་ཅན་གྱི་ཁང་རལ་ལས།།
སྐྱེ་དགུའི་མདོ་ན་ཡང་སྙིང་ཅི་ཞིག་ལྷག།

ཁྱིམ་ཚང་སྟོང་བའི་དབུལ་བོས་སྡུག་གླུ་གྱེར།།
སྤུན་ཟླ་བརླག་པའི་རོ་ཡིས་ས་གཞི་ཁེངས།།
སྲིད་པའི་ཁམས་འདིར་སྙིང་རྗེའི་བདག་པོ་ཞིག།
དོན་གྱིས་ཡོད་ན་ད་ནི་དུས་ལ་བབས།།