ཨ་མའི་རྨི་ལམ

ཡུལ་ཤུལ་ས་འགུལ་ཁྲོད་དུ་ཕ་མ་གཉིས་འདས་པའི་བུ་མོ་ཞིག་ལ་བྲིས་པ།
གཅན་མེ་སྟག

ནམ་རྒྱུན ང་རང་ཨ་མའི་རུམ་དུ་ཉལ་གོམས་པས
ནམ་ཡང་བདེ་ལྷོད་ལྷོད་ཀྱིས་གཉིད་དུ་ཡུར་བཞིན་ཡོད
ང་ནི་ཨ་མའི་སྙིང་གི་ཕྱེད་ཀ་ཡིན

ཞོགས་པ་འདིར ང་རང་གློ་བུར་དུ་སད་དུས
ངས་ཨ་མའི་ཞི་འཇགས་ཀྱི་རྔུར་སྒྲ་ཐོས་མ་བྱུང་ལ
ཨ་མའི་ཤ་དྲོད་ལས་མཆེད་པའི་བདེ་ལྷོད་ཀྱི་སྐྱིད་སྣང་ཀྱང་ཚོར་མ་བྱུང་སྟེ
སྐད་ཅིག་མའི་དྲན་ཚུལ་ཞིག་ལ
ཨ་མའི་རྨི་ལམ་ནི ཐག་རིང་ཐག་རིང་ཞིག་ལ་ཕྱིན་སྣང་སྐྱེས

གཉིད་ཐུན་གཅིག་གིས
ངས་རང་ཉིད་ཀྱི་ཨ་མ་བོར་ཞིང ཨ་མའི་རྨི་ལམ་བོར་ལ
ཞོགས་པ་རེ་རེར་ངའི་གཅེས་མིང་ནས་འབོད་པའི
ངག་འཇམ་འཇམ་གྱི་སྐད་སྒྲ་དེའང་བོར་སོང
སྐད་ཅིག་གི་དྲན་ཚུལ་ཁྲོད
ངས་ང་རང་ཡང ཐག་རིང་ཐག་རིང་ཞིག་ལ་བོར་སྣང་སྐྱེས

ལས་འབྲས་ཞེས་པ་ལ་ང་གཏན་ནས་ཡིད་མི་ཆེས་ཏེ
ངས་ད་དུང་འཇིག་རྟེན་གྱི་བདེ་སྡུག་འགྲིམས་མ་མྱོང་ཞིང
ངས་ད་དུང་འཁོར་བའི་མཐའ་མཇུག་གི་བདེན་པ་རྙེད་མ་བྱུང་བས
རྒྱུ་མེད་ཀྱི་ལས་དབང་འདིས
ངའི་ཨ་མའི་རྨི་ལམ་གྱི་མཛེས་སྣང་གང་དུ་ཁྱེར

དེ་རིང
ངས་ཨ་མའི་རུམ་ཁ་ན་ལྷག་པའི་དུངས་བརྩེ་དེ་འཚོལ་ཕྱིར
ངས་ཨ་མའི་འཁུར་ཚོས་ན་འཛུམ་པའི་སྐྱིད་ཀོང་དེ་མཐོང་ཕྱིར
ངས་ནུས་ཤུགས་སྒོང་ནས་ཨ་མ་འབོད་བཞིན་ཡོད

གནམ་རྒན་མ་ཡ ཐལ་རྡུལ་དང་སྨུག་པ་འདི་ཡིས
ངའི་མིག་ལམ་གྱི་འཇིག་རྟེན་མ་གཡོགས་དང
ངས་རང་གི་སེམས་གཏིང་གི་ཨ་མ་དང
ཨ་མའི་ཞི་འཇམ་གྱི་རྨི་ལམ་ཅིས་ཀྱང་འཚོལ་དགོས་ཡ

༢༠༡༠ལོའི་ཟླ༤་པའི་ཚེས་༡༦ཉིན།

ངའི་མྱ་ངན་ཞུ་ཚིག

སྐྱེ་རྒུའི་ས་ཡོམ་གྱི་ཁྲོད་དུ་གོད་ཆག་ཕོག་པའི་མི་མང་ལ་ཕུལ་བ།
ཀླུ་སྨྱོན།

འགྲོ་བ་སེམས་ཅན་གཉིད་ལས་སད་མ་སད་ཀྱི་དུས་ཚོད་ཅིག་ལ།
སྙིང་ལ་ཟུག་པའི་འུར་སྒྲ་ཞིག་གི་རྗེས་སུ།
ས་ཆེན་པོ་འདི་རིམ་པ་དྲུག་ཏུ་གཡོས་སོང་།
རིམ་པ་དྲུག་དང་གྲངས་ཆུང་དགུ་རུ་གཡོས་སོང་།
འུར་སྒྲ་དང་ཆོམ་སྒྲའི་ཀློང་ནས།
སྡོད་ཁང་བརྡིབས་སོང་ལ་ལྷ་ཁང་ཡང་འཇིག་སོང་།
ས་རྡུལ་དང་ངུ་འབོད་ཀློང་ནས།
མཆོད་རྟེན་ཉིལ་སོང་ལ་མགྲོན་ཁང་ཡང་ཞིག་སོང་།
ཕོ་མོ་དང་རྒན་གཞོན་མེད་པར།
བོད་མགོ་ནག་ཚོ་ས་གཅུར་རྡོ་གཅུར་བྱས་སོང་ལ།
ཆོལ་ཁ་དང་ཆོས་ལུགས་མེད་པར།
བོད་རྩམ་ཟན་ཚོ་དམར་པོ་ཁྲག་ལ་བསྒྲེས་སོང་།
ས་ཆེན་པོ་འདིར་སྙིང་རྗེ་ཅི་ཡང་མེད་པར།
དགོན་པའི་རྗེས་སུ་དགོན་པ་འཇིག་སོང་ལ།
གནམ་སྔོན་པོ་འདིར་མིག་ཟུང་ཅི་ཡང་མེད་པར།
གྲོང་བའི་རྗེས་སུ་གྲོང་པ་བསྣུབས་སོང་།
ཉལ་སའི་ནང་གི་རྒན་རྒོན་ཚོ་བསད་སོང་ལ།
ཉིན་ལས་ཅན་གྱི་ན་གཞོན་ཚོ་བསད་སོང་།
སློབ་གྲྭའི་ནང་གི་བྱིས་པ་ཚོ་བསད་སོང་ལ།
དགོན་པའི་ནང་གི་བན་ཆུང་ཚོ་ཡང་བསད་སོང་།
སྐད་ཅིག་དེ་ཉིད་ལ།
མཛེས་སྡུག་གི་གྲོང་ཁྱེར་ཞིག་དམྱལ་ཁམས་བཅོ་བརྒྱད་དུ་བསྒྱུར་སོང་།
བལྟས་བལྟས་རིག་རིག་ལ།
ཞི་འཇགས་ཀྱི་གྲོང་བརྡལ་ཞིག་ངུ་འབོད་ཀྱི་འཇིག་རྟེན་དུ་གྱུར་སོང་།
ཡ་ང་བའི་སྲང་མདོ་རེ་རེ་ནས།
ཕ་མ་མེད་པའི་དྭ་ཕྲུག་གི་མིག་ནས་ཕ་མ་འབོད་པའི་མིག་ཆུ་ཁྲག་ཏུ་འབབ་ཅིང་།
ཡི་མུག་པའི་སྲང་བར་རེ་རེ་ནས།
བུ་ཕྲུག་ཤི་བའི་ཕ་མའི་ངག་ནས་བུ་ཕྲུག་འབོད་པའི་ངུ་ངག་སྙིང་ལ་མཛེར་ཡོང་།
བཀྲ་ཤིས་ཀྱི་གཅེས་པའི་ཚེ་སྲོག་བརླགས་སོང་།
དོན་གྲུབ་ཀྱི་གཅེས་པའི་ལུས་པོ་བརླགས་སོང་།
ཚེ་རིང་གི་གཅེས་པའི་ཕ་མ་བརླགས་སོང་།
ཟླ་བ་ཡི་གཅེས་པའི་བུ་ཕྲུག་བརླགས་སོང་།
མདོར་ན།
བརྩེ་དུང་མཚོ་ལས་ཟབ་པ་ཐམས་ཅད་ས་འོག་ཏུ་ཚུད་སོང་།
ཞེན་ཆགས་རི་ལས་ལྕི་བ་ཡོད་ཚད་ས་འགུལ་གྱིས་ཁྱེར་སོང་།
ཤུལ་དུ་ཅི་ཡང་མ་ལྷག་པར་ས་འོག་ཏུ་ཐིམ་སོང་།
དཀོན་མཆོག་གསུམ་པོའི་སྤྱན་གྱིས་གཟིགས་ས་ནས།
སྐྱེ་རྒུའི་མི་མང་ས་འོག་ཏུ་ཚུད་སོང་།
ཆོས་སྐྱོང་སྲུང་མའི་རྣ་བའི་གོ་ས་ནས།
སྐྱེ་རྒུའི་མི་མང་ས་འགུལ་གྱིས་མནན་སོང་།
དེ་རིང་།
གྲོང་ཁྱེར་ནི་གྲོང་ཁྱེར་དང་མི་འདྲ་བར་དུར་ཁྲོད་དང་འདྲ་ལ།
དེ་རིང་།
དགོན་པ་ཡང་དགོན་པ་དང་མི་འདྲ་བར་གཡུལ་ས་དང་འདྲ།
ཨུ་ཧུ་དཀོན་མཆོག་གསུམ།
དེི་རིང་མ་སེམས་ཅན་སྡུག་བསྔལ་གྱི་དོང་ཞབས་སུ་ལྷུང་སོང་ལ།
ཨུ་ཧུ་སྤྱན་རས་གཟིགས།
དེ་རིང་འབངས་མགོན་མེད་སྐྱོ་གདུང་གི་དྲ་བ་རུ་ཚུད་སོང་།
དེ་རིང་གཅེས་པའི་ཚེ་སྲོག་ཤོར་སོང་ལ།
དེ་རིང་བསགས་པའི་རྒྱུ་ནོར་བརླགས་སོང་།
དེ་རིང་མཛའ་བའི་གཉེན་བཤེས་གྲོངས་སོང་ལ།
དེ་རིང་མིག་གི་མཆི་མ་ཡང་བསྐམས་སོང་།
ད་ནི་ཕ་མ་མེད་པའི་དྭ་ཕྲུག་དེ་ཚོར་སུས་བདག་པོ་རྒྱག་གི་རེད།
ད་ནི་བུ་ཕྲུག་མེད་པའི་རྒན་རྒོན་དེ་ཚོར་སུས་གཉོར་སྐྱོང་བྱེད་ཀི་རེད།
ད་ནི་ལས་ལ་ཁ་གཡར་ནས་ལྷོད་ལྷོད་སྡོད་ཀྱི་ཡིན་ནམ།
ད་ནི་ལམ་ལ་ཆས་ནས་རོགས་རམ་བྱེད་མགོ་རྩོམ་གི་ཡིན།
ད་ནི་ལག་གཉིས་ཐལ་མོ་སྦྱར་ཏེ།
འདས་གྲོངས་ཕྱིན་པ་དག་བདེ་བ་ཅན་ནས་སྐྱེ་བའི་སྨོན་ལམ་དང་།
ད་ནི་མིག་གཉིས་མཆི་མས་གང་སྟེ།
ཤུལ་དུ་ལུས་པ་ཚོར་སྡུག་བསྔལ་ལས་ཐར་བའི་རོགས་རམ་བྱེད།
ཚེས་བཅུ་དྲུག་དགོང་མོར་ཨ་རིར་བྲིས།

༢༠༡༠ ༤ ༢༠

ང་ཡི་སྐད་ཆ་ཚར་ཐལ་སྐྱེ་རྒུ་པ།

4.14ཁམས་སྐྱེ་རྒུའི་ས་ཡོམ་དོན་རྐྱེན་ལ་སྦྱར་བ།
སེང་རྡོར།

དེ་རིང་ཡང་ནི་སྔར་ལོ་བཞིན་དུ་མྱ་ངན་ཚིག་ཐུང་འབྲི་ཁུལ་བྱེད། །
དེ་རིང་ཡང་ནི་སྔར་ལོ་བཞིན་དུ་སྙུན་འདྲིའི་གཏམ་ཡག་བརྗོད་ཁུལ་བྱེད། །
ཐུང་ལ་ཉུང་བའི་ཡི་གེ་འགའ་ལ་རེ་བ་ཡོངས་རྫོགས་བཅོལ་བ་ཡི། །
འཆི་རྐྱེན་ཟད་པའི་ལས་ངན་ཁོ་བོ་ད་དུང་གསོན་འདི་ངོ་རེ་ཚ། །

དེ་རིང་ ཡང་ནི་སྔར་ལོ་བཞིན་དུ་ལེགས་སྦྱར་རེ་གཉིས་འདོན་ཁུལ་བྱེད། །
དེ་རིང་ཡང་ནི་སྔར་ལོ་བཞིན་དུ་ལྕགས་གོང་རེ་གཉིས་བསྒྲོན་ཁུལ་བྱེད། །
མིག་སྤུའི་གསེབ་ཀྱི་ཆུ་ཟིལ་འགའ་ལ་གདུང་སེམས་མཉམ་སྐྱེད་འབོད་པ་ཡི། །
འཆི་རྐྱེན་ཟད་པའི་ལས་ངན་བདག་རང་ད་དུང་གསོན་འདི་ངོ་རེ་ཚ། །

རང་ བྱུང་ཁམས་ཀྱི་རྩེད་ཆས་ཡིན་པའི་མི་ཡི་རིགས་འདིས་ཅི་ཞིག་ནུས། །
ཉི་མ་གཅིག་ལ་འཛམ་གླིང་བསྣུབ་ཀྱང་བློ་དང་ཇུས་བཀོད་ཡེ་ནས་མེད། །
གཉོམ་ཆུང་བཏུལ་བའི་ཨ་ཕོ་མང་ཡང་གལ་ལ་ཐུག་དུས་ལག་རྡུམ་རྐྱང་། །
འཆི་རྐྱེན་ཟད་པའི་ལས་ངན་ཁྱོད་ཀྱང་ད་དུང་གསོན་འདི་ངོ་རེ་ཚ། །

རང་ བྱུང་ཁམས་ཀྱི་མཆན་ཤིག་ལྟ་བུའི་མི་ཡི་རིགས་འདིས་ཅི་ཞིག་ནུས། །
སེན་རྒན་གཉིས་ཀྱིས་ནམ་ཞིག་གཅིར་བ་ཁྱོད་ཀྱིས་བློ་ཚོད་ཨེ་ཐུབ་བམ། །
བཅུ་གཉིས་ཕྱི་མར་ཨ་རིའི་ཙུང་ཐུང་ས་ཡོམ་ཁྲོད་དུ་འགྱེལ་པའང་། །
འཆི་རྐྱེན་མང་བའི་རྐང་གཉིས་འོ་ཅག་སྡུག་ལ་ཐུག་པའི་རྣམ་ཐར་རེད། །

མི་ནི་ འདི་ལྟར་གྲོག་མ་བཞིན་དུ་ནམ་ཤི་ཆ་རུ་དཀའ་བ་དང་། །
ཚེ་ནི་འདི་ལྟར་མཆོད་མེ་བཞིན་དུ་གར་གཟིམ་འདིར་གཟིམ་མེད་པས་ན། །
རྗེས་དྲན་ཞེས་པའི་ཚིག་ཐུང་འགའ་ཡིས་སེམས་དང་སེམས་པ་སྦྲེལ་བ་ཡང་། །
ན་བའི་དུས་ཀྱི་སྦྲིད་སྨན་ཙམ་དུ་སྐྱེ་བོ་ང་ཅག་མཉམ་དུ་འཐུང་། །

སྐྱེ་ རྒུའི་གྲོང་གི་འདས་པོ་ཁྱོད་ཅག་དེ་ཙམ་བྲེལ་བྲེལ་མ་གནང་དང་། །
སྐད་མང་རིགས་མང་འགྲོ་བ་ཡོངས་རྫོགས་བྱ་ཁྱུ་བཞིན་དུ་འཕུར་ནས་འགྲོ །
བདེ་བ་ཅན་ཞིག་གཞི་ནས་མེད་ཀྱང་ཡོད་ཡོད་ཙམ་དུ་སྒོམས་ལ་སོང་། །
འོད་དཔག་མེད་ཅེས་སྐྱོབ་པ་མཆོག་ཅིག་སེམས་ཀྱི་གདན་ལ་གསལ་དུ་ཐོབས། །

༢༠༡༠.༤.༡༤ཉིན་གྱི་ཕྱི་དྲོའི་ཆུ་ཚོད་ལྔ་པ་ཙམ་ལ་ངུ་བཞིན་དུ་བྲིས།

ཆགས་འཇིག་ནག་པོ།

ཨ་ཚོགས་བློ་བྷེ།

སུས་ཀྱང་ཚད་མི་ཟིན་པའི་རང་བྱུང་གི་ཆགས་འཇིག
སུས་ཀྱང་ཚོད་མི་ཟིན་པའི་ཚེ་སྲོག་གི་གོད་ཆག
རྨི་འཕྲུལ་ཀྱི་ཀུ་རེ་ཞིག་དང་འདྲ་བའི་མྱིའི་མི་ཚེ་ཟེར་བ།
ལྷུང་ཆོག་ཆོག་གི་མིག་ཆུ་ཞིག་རེད།
སྨྲེང་ཆོག་ཆོག་གི་སྐྱོ་སྣང་ཞིག་རེད།

དེ་རིང་རི་རབ་ཀྱི་འདར་ཤུགས་དྲག་པོས།
ངའི་མིང་སྲིང་ཁྲི་ཕྲག་གི་ཚེ་སྲོག་སྡེབ་ཏུ་མིད་ཚུལ་བཀླགས་ནས།
མ་ཎིའི་དབྱངས་རྟ་མི་ཐོས་བའི་ནུབ་ཕྱོགས་ཀྱི་གྲུ་ཟུར་ཞིག་ནས།
སྐྱོ་གདུང་ནི་ཡུལ་ཤུལ་དང་མཉམ་དུ་བུད་སོང་ལ།
རེ་བ་ནི་ཡུལ་ཤུལ་དང་ལྷན་དུ་ལུས་ཡོད།

ཡུལ་ཤུལ་གྱི་ང་ཚོའི་ནང་མི་སྤུན་མཆེད།
ང་ཚོའི་ཁ་ཐག་ཇི་ལྟར་རིང་ཡང་ཕུགས་བསམ་གཅིག་ཡིན།
ང་ཚོ་ཐུན་མོང་གི་རེ་འབྲས་མ་སྨིན་གོང་བར་ཆད་ཀྱིས་ཁ་ཁར་བཏང་སོང་བས།
ཐག་རིང་གི་ང་ཚོས་ཕ་ཡུལ་ཡུལ་ཤུལ་ལ་མྱ་ངན་ཞུ་བཞིན་ཡོད།
མིག་ཆུ་གཏོང་བཞིན་ཡོད།

དཀོན་ཅོག་གི་སྤྱན་གྱིས་གློད་པ་འདྲ་བའི།
ད་ལྟའི་མྱ་ངན་འདི་སུས་ཀྱང་སྙིང་ནས་བཟོད་དཀའ་ཡང་།
མཆོད་སྟེགས་ཀྱི་མར་མེ་བཞིན་གཟིམས་ཚར་བའི་ཚེ་སྲོག་ཁྲི་ཕྲག
སླར་ཡང་ང་ཚོའི་བུ་སྤུན་དུ་སྐྱེས་པའི་སྐྱབས་འཇུག་ཞུ་བ་ལས་ཅི་ཡང་མི་འདུག
ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ།

༢༠༡༠ ༤ ༡༥ཉིན་བྲིས།

མཆོད་མེ་ཀོང་བུ་གང་ལས་མེད་ཀྱང༌།

ས་ཡོམ་གྱི་གོད་ཆག་ཐེབས་པའི་ཕ་ཡུལ་གྱི་སྤུན་ཟླ་ཚོར།
སྐྱ་མདའ།

ས་ཁམས་འདི་ལས་ཡངས་ཤིང༌།
རི་རབ་སྟོང་གིས་ཀྱང་མི་ཁོག་པའི་མིག་ཆུ་ལྷུང་ལྷུང་དུ་ བཞུར་གྱིན།
འདར་སིག་སིག་གི་ལག་ཟུང་འདི་སྒུལ་བཞིན།
ངའི་ཕ་ཡུལ་གྱི་གོད་ཆག་དེའི་སླད་དུ།
མིག་ཆུ་དང་ལྷན་དུ་གྱེར་བའི་སྙན་ངག་གི་མཆོད་འབུལ་འདེབས་ ཀྱིན་ཡོད།

སྤུན་ཟླ་ཚོ། ས་འདི་ནས་ཀྱང་བྲེལ་བྲེལ་ཟིང་ཟིང་གིས།
ཡར་ལྷ་རུ་མཆོད་པ་དང༌། མར་ངན་སློང་ལ་སྦྱིན་པ་གཏོང་གིན།
རྣམ་ཤེས་དང་སེམས་ནུས་ཡོད་དགུ།
རྒྱང་རིང་གི་ཕ་ཡུལ་དུ་བཞུད་ཀྱིན་འདུག
ཕ་ཡུལ་གྱི་རི་བྲག་འདིལྟར་ཉིལ་དུས།
སུ་ཞིག་གིས་བཟོད་པར་ནུས།
ཕ་ཡུལ་གྱི་མཚོ་མོ་འདི་ལྟར་སྐེམ་དུས།
ངའི་དབང་རྩའི་རྡུལ་ཕྲན་རེ་རེ་ནས་སིལ་བུར་འཐོར་གྱིན་ ཡོད།

ངའི་ཕ་ཡུལ་གྱི་གློ་སྙིང་ལ་ཁབ་བཙག་གིས་མ་འབིགས་རོགས།
ཞི་བདེ་དང་ཁོར་ཡུག་དེའི་ཆེད་དུ།
ངའི་ཕ་ཡུལ་གྱི་ལུས་ཁམས་ལ།
ཁྲག་དམར་གྱིས་སྦགས་པའི་སོར་མོས་མ་འབྲད་རོགས།
ཉམ་ཆུང་གི་སྤུན་ཟླ་རྣམས་ཀྱི་ཆེད་དུ།
གནས་མཆོག་འདི་ནི།
སེམས་པ་ཁྲི་སྟོང་མང་པོའི་འཚོ་གནས་དང་རེ་ལྟོས་བཅའ་ས་ཡིན།

༢༠༡༠ ༤ ༡༦

ཡུལ་ཤུལ། ཆེས་གཅེས་པར་འོས་པའི་ཕ་ཡུལ།

གཟུངས་ཕྱུག་སྐྱིད།

གནམ་རྒན་མ་དགོད་ཀྱིན་འདུག
སོ་ཕྲེང་མི་མངོན་པའི་སྐྱི་པགས་ཀྱི་བར་ན་དགོད་ཀྱིན་འདུག
ན་ཟུག་མེད་པའི་འཁུན་སྒྲ་ཡི་ཀློང་ན་དགོད་ཀྱིན་འདུག
འདི་ནི་མིག་ཟུང་ཁྲག་གིས་སྐམ་ཟིན་པའི་ཞོགས་པ་ཞིག་ཡིན་ནམ།
ཡང་ན་དབྱངས་རྟ་ཐག་པས་བཀག་ཟིན་པའི་ས་སྲོད་ཅིག་ཡིན།

ཆེས་རང་བྱུང་དང་འཇིགས་སྣང་ཞིག་གི་གཡོ་འགུལ་ཁྲོད།
མཛེས་སྡུག་གི་ཚེ་སྲོག་རེ་རེ་ནི་ཇི་འདྲའི་སྙིང་ཉེ་བའི་ཤ་རུས་ཀྱི་ན་ཟུག་ཞིག་རེད་ཨང་། ཆེས་དྭངས་གཙང་དང་དྲོད་སྣང་གིས་འཁྱིལ་བའི་ཁྱིམ་གཞི་དེ་ནས།
གློ་བུར་དུ་མུན་ནག་གི་མྱ་ངན་ཞིག་གནམ་སའི་བར་དུ་མཆེད་ཅིང་།
ཆག་འཇིག་གི་ལོ་རྒྱུས་ཤིག་རི་ཆུའི་གཏིང་བར་འཐིམ་སོང་།

འདི་ལྟར སང་ཉིན་གྱི་རྨི་ལམ་ན་སྦྲུམ་པའི་ཁྱིམ་གཞི་ཞིག་རང་བྱུང་གིས་རྨག་མེད་དུ་བཅོམ་ཡང་།
འདི་ལྟར་ཟོལ་མེད་དྭངས་གཙང་གིས་འཁྱིལ་བའི་འཛུམ་མདངས་ཤིག་འོ་དོད་ཀྱིས་ཧྲུག་ཧྲུག་འཆས་ཀྱང་། མི་ཡུལ་འདིར་ཁྱེད་རང་དུས་གཏན་དུ་ཁེར་རྐྱང་ཡིན་མི་སྲིད།
རྩིས་སུ་མེད་པའི་མིག་ཟུང་དུ་མ་ཞིག་གི་དུང་སྣང་གིས་ཁྱེད་རང་འཚོལ་གྱིན་ཡོད་ལ།
འཇགས་སུ་མེད་པའི་སེམས་མ་གྲངས་མེད་ཅིག་གི་ན་ཟུག་གིས་ཁྱེད་ཚོ་མཐོ་རུ་བསྒྲེངས་ཡོད།

བདག་གི་བཞུད་སོང་བའི་གཉེན་ཉེ་ལགས།
རྨི་ལམ་ལྟ་བུའི་གས་ཆག་དམར་པོ་ དེའི་སྲུབས་ཀ་རེ་རེ་ན།
མིག་ཆུ་བཞུར་མ་ཚར་བའི་སེམས་པ་ག་ཚོད་སྦས་ཡོད།
འཇིགས་རུང་ལྟ་བུའི་འུར་ཟིང་ནག་པོ་དེའི་སྟེང་རིམ་ན།
མིག་ཟུང་དྲུས་ཚར་བའི་བརྩེ་འདང་ཅི་ཙམ་ལུས་ཡོད་ཨང་།
བདག་གི་སྤུན་ཟླ བདག་གི་གཉེན་ཉེ བདག་གི་ཕ་ཡུལ་ཨ།

ཆེས་རྒྱང་ཐག་རིང་བའི་མི་ཡུལ་གྱི་ཡུལ་མཐའ་ཞིག་ནས།
མར་མེ་རྐང་གཅིག་གི་སེམས་འདུན་མཐོ་རུ་བསྒྲེངས་བཞིན།
བདག་གིས་འདི་ལྟར་འཇིག་རྟེན་ལ་འཁང་ར་བྱེད་ཀྱིན་ཡོད།

ཆེས་སྐྱོ་གདུང་དང་མྱ་ངན་ལྕི་བའི་ ས་སྲོད་ཅིག་ལ།
མ་ཎི་ཚར་གཅིག་གི་དབུགས་དབྱུང་ཁྲོད་ནས།
བདག་གིས་འདི་ལྟར་རང་ཉིད་ལ་ངེས་ཤེས་བཙལ་གྱིན་ཡོད།
ཡུལ་ཤུལ། ཆེས་གཅེས་པར་འོས་པའི་བདག་གི་ཕ་ཡུལ་ལགས

༢༠༡༠ལོའི་ཟླ་༤ཚེས་༡༤ཉིན་ཡུལ་ཤུལ་སྐྱེ་རྒུ་གྲོང་རྡལ་དུ་བྱུང་བའི་ས་འགུལ་ཐོས་རྗེས་སུ་བྲིས།

ཨོཾ་མ་ཎི་པདྨེ་ཧཱུྃ།

མི་ཁོམ་པའི་རྒྱལ་སྲས།

ཨོཾ་མ་ཎི་པདྨེ་ཧཱུྃ། ་་་ ་་་
རང་བྱུང་གནོད་འཚེ་འདི་གང་གིས་མི་ཁོག།
ཤི་རྨས་སྡུག་བསྔལ་དེ་སུས་ཀྱང་མི་ཐེགས།།
འོན་ཀྱང་སྤུན་ཟླ་ཚོས་གདུང་སེམས་མཉམ་བསྐྱེད།།
གོ་ལ་ཟླུམ་པོ་འདི་ཡོམ་པོར་བྱས་ཡོད།།
ཨ་ཧོ་ཡུལ་ཤུལ་གྱི་སྤུན་ཟླ་རྣམ་པར།།
ཧ་ཅང་སྐྱོ་གདུང་གིས་མིག་ཆུ་བཏང་ཡོད།།
ས་ཡོམ་བདུན་གཅིག་ཡན་འཁྲུག་ཚུལ་འོག་ན།།
ཤ་ཁྲག་རུས་འདྲེས་ཀྱི་སྤུན་ཟླ་ཁྱོད་ཚོ།།
ལ་འུར་རང་བྱུང་གི་འཇིག་པ་སླེབས་པས།།
ར་བ་ཁང་ཁྱིམ་དང་མི་ཟོག་ཡོད་ཚད།།
ཡ་ངའི་འཇིགས་རུང་གི་གནས་སུ་བསྐྱལ་སོང༌།།
འ་ཅག་སྤུན་ཟླ་ཡོངས་སེམས་པ་སྐྱོ་ཡོད།།
ཟ་བྱེད་གཤིན་རྗེ་ཡི་ཁ་རུ་ཚུད་པའི།།
ཞི་བར་མནལ་བ་ཚོར་གསོལ་འདེབས་བྱས་ཡོད།།
ཝ་རཱ་ཎ་སཱ་ཡི་འོད་ཟེར་གྲོང་ན།།
ཛ་ཡ་རྒྱལ་མཆོག་གིས་སྤྱན་རས་གཟིགས་ཡོད།།
ཚ་འུར་རང་བྱུང་གིས་གནོད་པའི་སྤུན་ཟླར།།
ཙ་ན་ཡིན་ཡང་དུ་གདུང་སེམས་མཉམ་བསྐྱེད།།
མ་བུ་ཁ་བྲལ་གྱི་ངུ་འབོད་ཀློང་ན།།
བ་གམ་ཁང་བརྩེགས་ཀྱི་འཐོར་བཤིག་གསེབ་ན།།
ཕ་རོལ་འདས་པོ་ཚོའི་རྣམ་ཤེས་འཁྱམས་པོར།།
པ་སངས་སྐར་འོད་འདྲའི་མར་མེ་སྒྲོན་ཡོད།།
ན་རག་དམྱལ་ཁམས་ཀྱི་སྡུག་བསྔལ་ཡོད་ཚད།།
ད་ལྟ་ངེད་ཅག་གི་མགོ་ལ་སླེབས་སོང༌།།
ཐ་དད་ཡུལ་ཕྱོགས་ཀྱི་སྤུན་ཟླ་རྣམས་དང༌།།
ཏཱ་ལའི་མཚན་ཅན་སོགས་སྐྱོ་བ་སྐྱེས་ཡོད།།
ཉ་གང་ཟླ་རྒྱས་ཀྱི་ལྷག་བསམ་དཀར་པོས།།
ཇ་སྐོམ་ཟས་ཆད་ཀྱི་ཁྱོད་ཚོ་སེམས་བཞིན།།
ཆ་རྐྱེན་ཡོད་ཚད་ཀྱི་སྟོང་བའི་ཁྱོད་ཚོར།།
ཅ་ལག་ཟས་གོས་ཀྱི་རོགས་རམ་བྱ་ངེས།།
ང་ཅག་ལུས་པོ་འདི་རྨས་སྐྱོན་མེད་ཀྱང༌།།
ག་ཆད་སེམས་པ་འདི་མཉམ་དུ་རྨས་ཡོད།།
ཁ་ཁོག་མེད་པ་ཡི་སྡུག་གཏམ་འདིས་ཀྱང༌།།
ཀྭ་ཡེ་སྤུན་ཟླ་ཚོར་མྱ་ངན་ཞུས་ཡོད།།
ཡབ་རྗེ་བླ་མ་ཡི་གདན་ས་དེ་ན།།
དོན་མེད་ལེ་ལོ་ཡིས་ཉིན་མཚན་བསྐྱལ་བའི།།
གྲྭ་རྐྱང་མི་ཁོམ་པའི་རྒྱལ་སྲས་འབོད་པས།།
སྐྱོ་བའི་མཆི་མ་དང་མཉམ་དུ་བྲིས་ཡོད།།
ཨོཾ་མ་ཎི་པདྨེ་ཧཱུྃ། ་་་ ཨོཾ་མ་ཎི་པདྨེ་ཧཱུྃ། ་་་ ཨོཾ་མ་ཎི་པདྨེ་ཧཱུྃ། ་་་ ་་་

ངས་འདི་ལྟར་འཁང་ར་བྱེད་ཀྱིན་ཡོད།

གཟུངས་མོ་སྐྱིད།

ས་ཕུག་དང་རྡོ་ཁང་ན་ཉལ་བའི་ཚེ་སྲོག་དག་ལ་ཉེས་པ་ཅི་ཞིག་ཡོད
མིག་ཆུ་དང་མྱ་ངན་ཁྲོད་ལྷག་པའི་ད་ཕྲུག་དག་ལ་ཉེས་པ་ཅི་ཞིག་ཡོད
གནམ་རྒན་མ
ངས་འདི་ལྟར་ཁྱོད་ལ་འཁང་ར་བྱེད་སྲིད
རང་བྱང་གི་གནོད་འཚེ་ནི་ཟློག་ཏུ་མེད་པའི་ཆོས་ཉིད་དུ་གྲུབ་པ་བདེན་ཡང
ཅི་ཞིག་ལ ཁྱོད་ཀྱི་ཁྲོ་གཉེར་གྱི་སྡང་སྡིགས་དྲག་པོས
བདག་གི་མཛེས་སྡུག་གི་རི་ཆུ་བཅོམས་ནས་འགྲོ་དགོས
བདག་གི་དངས་གཙང་གི་རྨི་ལམ་དཀྲོགས་ནས་འགྲོ་དགོས
གནམ་རྒན་མ
སུ་ཞིག་གིས་ཁྱོད་ཀྱི་དག་གཙང་གི་ངོ་གདོང་ལ་ཕོག་ཐུག་བཏང་ཡོད་རུང
མཛེས་སྡུག་གི་གཟུགས་རིས་ལ་ནག་ཉེས་བཟོས་ཡོད་རུང
ས་རྡོ་དང་གྱང་ཆག་གི་བར་ལ་འཐིམས་པའི་ཁྲག་ཐིགས་དེ་དག
ཉེས་མེད་ཉམ་ཆུང་གི་ཚེ་སྲོག་རྐྔང་རྐྱང་ཡིན
ཅི་ཞིག་ལ ཁྱོད་ཀྱིས་སྡང་སྡིགས་ཀྱི་མིག་ཟུང་ང་ཚོར་ཅེར་ནས་ཡོང་དགོས
རྣམ་སྨིན་གྱི་ཉེས་ཆད་ང་ཚོར་གཏད་ནས་འདུག་དགོས
རང་བྱང་གི་ཆག་འཇིག་འདི་ཁྱོད་ཀྱིས་ང་ཚོར་བཏང་བའི་ཉེན་བརྡ་ཡིན་ཡང
དེ་རིང་གི་ས་གཞི་ནི་ཆེས་མུན་ནག་དང་འཇིགས་རུང་གི་དམྱལ་ཁམས་རེད
ཁྱོད་ཀྱིས་ཞེ་སྡང་གི་གཡོ་འགུལ་ཐེངས་གཅིག་བར་ནས
ང་ཚོའི་རྨི་ལམ་དང་བརྩེ་འདང་མ་ལུས་བཅད་ནས་བུད་སོང
ང་ཚོའི་སེམས་པ་དང་མིག་ཆུ་ཡོད་ཚད་དཀྲུགས་ནས་བུད་སོང
འདི་ལྟར ང་ཚོའི་དྲོད་སྣང་གི་ཁྱིམ་གཞི་དང་རང་བྱུང་གི་མཛེས་སྡུག་མ་ལུས
ཁྱོད་ཀྱིས་སེར་སྣ་དང་སྙིང་རྗེ་མེད་པར་ཁྱུར་མིད་བཏང་ཡང
ང་ཚོར སྔར་བཞིན་སེམས་པ་དང་ལག་ཟུང་གྲངས་མེད་ཀྱི་དཔུང་རོགས་ཡོད
དད་འདུན་དང་སྨོན་ལམ་གྲངས་མེད་ཀྱི་སྟོབས་ཤུགས་ཡོད་པས
བདག་གི་སྤུན་ཟླ་དང་ཡུལ་མི་ཚོ
ནམ་ཡང་ཁེར་རྐྱང་གིས་ལྷག་མི་སྲིད
དོ་ནུབ ངས་མུན་པ་དང་མིག་ཆུ་འདྲེས་མཚམས་ཀྱི་གྲུ་ཁ་ཞིག་ནས
མ་ཎི་ཡིག་དྲུག་གི་དབྱངས་རྟ་ཤུགས་ཀྱིས་གྱེར་བཞིན
བཞུད་ཟིན་པའི་བདག་གི་སྤུན་ཟླ་ཚོར་མྱ་ངན་ཞུ་བཞིན་ཡོད
ད་དུང སེམས་འདུན་གྱི་མཆོད་མེ་རེ་རེ་དལ་གྱིས་སྒྲོན་བཞིན
ས་ཆེན་གྱི་བྲང་ཁོག་ཕྱི་ལ་བཏོན་པའི་ཉེས་ཅན་ཚོའི་ཆེད་དུ
འགྱོད་གཤགས་ཀྱི་མིག་ཆུ་བཞུར་བཞིན་ཡོད

༢༠༡༠ ༤ ༡༦ཉིན།

མིག་ཆུ་བརློན་པ།

བློ་མིག

སེམས་པ་མི་བཟོད་འབར་བའི་སྡུག་བསྔལ་གྱིས་བསྲེགས་འདུག །
མིག་ཟུང་ཆུ་ཐིག་ཕྲེང་བའི་རྒྱུན་ཐག་གི་འབྲེལ་འདུག །
ཚེ་སྲོག་དབུགས་དྲོན་གཅོད་པའི་རང་བྱུང་གི་གནོད་པ །།
གློ་བུར་གང་འདོད་ཡོང་བ་ཅི་ཞིག་གི་ཡིན་ནམ །།

བྱམས་ལྡན་ཕ་མ་མེད་པའི་དྭ་ཕྲུག་གི་སྐོར་ཞིག །
བྲང་གི་ནུ་མ་སྐམ་པའི་ཨ་མ་ཡི་ཚོགས་ཤིག །
མི་ཤི་ཁྱིམ་སྟོང་གྱུར་བས་གྱང་རོ་སྟེ་ག་ཚོད །།
ཟས་ཀྱི་ལྟོགས་སྐོམ་མྱོང་བའི་ཤུལ་ལུས་ཀྱི་སྤུན་ཟླ ། །

གོད་ཆག་གྱོང་རྒུད་བྱུང་བའི་ལོ་རྒྱུས་ཀྱི་ཤོག་ལྷེ ། །
ས་འགུལ་བྱེ་རླུང་འཐུབ་པ་ལས་དབང་གི་བཀོད་སྒྲིག །
མྱ་ངན་འཁུན་སྒྲ་སྒྲོགས་བའི་ས་སྟེང་གི་སྐྱེ་འགྲོ །
ན་ཟུག་རུས་རྐང་ཐོན་པའི་ཚ་ཤད་ཀྱི་ལྕགས་མདའ ། །

འགྱོད་སེམས་ངུ་འབོད་གྱེར་བའི་རྒན་གཞོན་གྱི་ཕོ་མོ ། །
འཇིག་རྟེན་ཕྱི་མར་སོང་བའི་གྲྭ་གྲོང་གི་ཕུ་ནུ ། །
ལུས་སེམས་རྨ་ཁ་དོད་པའི་ཕྱི་ནང་གི་རིགས་མཐུན །།
བདག་གི་སྐྱོ་བ་དྲགས་པོའི་མིག་ཆུ་ཞིག་ཤོར་ཐལ །།

༢༠༡༠ ༤ ༡༦ ཉིན་དྲ་ཁང་ནས་ཤར་མར་བྲིས།

ས་བདག་གིས་རྨུགས་པའི་ཡུལ་ཤུལ།

རྨ་ཞོགས་རླུང༌།

ཚད་རིམ་བདུན་དང་གྲངས་ཆུང་གཅིག་ཅན་གྱི་ས་ཡོམ་ཞིག
མཆེ་བ་བགྲད་པའི་གཅན་གཟན་ལྟར
གདུག་རྩུབ་ཀྱིས་མཐོ་སྒང་གི་གཞིས་ཀར་འཛུལ་ཏེ
སྤུན་ཟླ་མང་པོ་ཞིག་ཁྱུར་མིད་དུ་བཏང་སོང

ཁ་སང་མཆོང་ལྡིང་བགྱིད་པའི་སོ་དཀར་གྱི་བྱིས་པ་དང
ཁ་སང་ཕྱག་སྐོར་ཕེབས་པའི་སྐྲ་དཀར་གྱི་རྒན་པ

ད་དུང ད་དུང
མི་མང་པོ་མང་པོ་ཞིག
ད་ལྟ་གྱང་ཆག་དང་ཤིང་རལ་གྱི་གསེང་དུ
རྣམ་ཤེས་བོར་ཟིན་པའི་བེམ་པོ་རུ་གྱུར་འདུག་ཟེར

སྐྱི་གཡའ་བའི་དོན་དེ
རྣ་བའི་གས་སྲུབས་གཏོར་ནས་ཤག་ཤག་ཏུ་བཞུར་ཡོང་དུས
སྙིང་འགོ་རུ་སོ་ཤད་རྒྱག་པ་ལྟ་བའི་ཟུག་གཟེར་མང་པོ་ཞིག
ང་ཚོའི་ཤ་གསེང་རུས་གསེང་དུ་སྤུངས་སོང

མྱ་ངན་འཐིབས་ཤིང་ངུད་མོ་མཆེད་པའི་ཡུལ་དེ་ནས
གཅེས་ཐང་ཆེ་བའི་ལུས་པོ་རྨ་ཁས་ཁེངས་ཤིང
ན་ཟུག་གི་འཁུན་སྒྲ་འབྱིན་པའི་སྤུན་ཟླ་རྨས་མ་ཚོར
འཇིགས་པའི་གཡང་གཟར་ལས
རིངས་པ་རིངས་པར་གྲོལ་ཞིང
སྔར་ལས་ལྷག་པའི་བདེ་ཐང་ཞིག་རྙེད་པར
དཀོན་མཆོག་གིས་ཐུགས་རྗེས་གཟིགས་རོགས

སྟོན་ལོ་བསེར་བུས་བདས་པ་བཞིན
བརྩེ་མེད་ས་བདག་གིས
མུན་པའི་འོབས་སུ་དད་པའི་རྣམ་ཤེས་གཉོམ་པོ་དག་ལ
ང་ཚོ་སྟེ་ཤུལ་དུ་ལུས་པ་དག་གིས
རྣམ་དག་གི་མཆོད་མེ་བཏེག་ནས
གདུང་བའི་དབྱངས་ཀྱིས་མྱ་ངན་ཞུ

༢༠༡༠ ༤ ༡༤

བླ་མ་མཁྱེན་ནོ།

ནགས་ཤོད་རིག་རལ།

ཤ་རུས་བར་ནས་སྡུག་གི་ཟུག་ངུ་དེ་ལྡང་ཞིང་། །
སྙིང་གི་ཁོངས་ནས་སྐྱོ་བའི་འཕར་རྩ་འདི་གཡོ་བ། །
རིགས་གཅིག་སྤུན་ཟླའི་སྐུ་ཕུང་རྩྭ་ལོ་ལྟར་འབར་དུས། །
ཡིད་ལ་མྱ་ངན་རི་བོའི་གནོན་ཤུགས་འདི་ལྕི་ཡ། །

ཕ་གཞིས་དྲོད་འཇམ་ལྡང་བའི་སྦྲ་ནག་ནས་བཏོན་སོང་། །
དཀར་ཞོ་ཟས་ཀྱི་བསོད་ནམས་འཚོ་རྟེན་ཡང་བཅོམ་སོང་། །
སྤུས་མེད་སྡོད་ཁང་སྲོག་གི་གཤེད་མ་རུ་འགྱུར་བ། །
རྐྱེན་ངན་བར་ཆད་འདི་འདྲ་མི་སེམས་སུ་གཤོང་དཀའ། །

མཁྱེན་ནོ་མཁྱེན་ནོ་བླ་མའི་ཐུགས་རྗེ་དེ་མཁྱེན་ནོ། །
དགོངས་སོ་དགོངས་སོ་ཡེ་ཤེས་དབྱིངས་རིག་གི་བདག་པོ། །
གློ་བུར་མི་ཚེ་རྫོགས་པའི་སྤུན་ཟླ་ཚོའི་རྣམ་ཤེས།། །
བླ་མའི་དྲིན་གྱིས་འོད་གསལ་ལམ་སྣེ་དེ་ཟིན་ཤོག །

གདུང་སེམས་མཉམ་བསྐྱེད།

4.14 ས་འགུལ་ཁྲོད་འདས་པའི་སྤུན་ཉེ་ཚོར་ཕུལ་བ།
མྱི་ཆེན

བརྩེ་ཆེན་ཧྲྰི་དཀར་གྱི་འཛུམ་པ་འབངས་ལ་ངོམ་པའི།།
འཛམ་གླིང་སྐྱེ་དགུ་ཡི་མིག་གཅིག་ཐུགས་རྗེས་གཟིགས་ཤིག །
ས་ཆེན་མྱ་ངན་གྱིས་བཟུང་བའི་གས་སྲིབས་རེ་ནས།།
ཁྲི་ཕྲག་རྣམ་ཤེས་ཀྱི་འོ་དོད་རྒྱང་ལ་བྱེར་ཡོད། །

ལྷ་ཆེན་ནུས་མཐུ་ཅན་ཡོད་ན་འཕུར་ནས་ཤོག་དང་། །
སྙིང་སྟོབས་ཕུལ་བྱུང་གི་རྫུ་འཕྲུལ་ངོམ་རན་འདུག་གོ།
ཡངས་པའི་ས་གོག་འདིས་ཚེ་སྲོག་ཁྲི་ཕྲག་མང་བོ། །
ཕངས་མེད་ཡ་ཁོག་ལ་དྲངས་པའི་མནར་གཅོད་མི་བཟོད། །

སྐྱིད་ཀྱི་ཉི་མ་དང་ལོ་ཟླའི་དཀྱོགས་མཚམས་རེ་རེར། །
ལས་དབང་རླུང་བུ་ལ་བཅིབས་པའི་གཞོན་སྐྱེས་ཕོ་མོ།།
གློ་བུར་ཉེས་མེད་ངང་འབྱུང་བའི་ཁམས་སུ་ཐིམ་པས།།
འཇིག་རྟེན་འཁོར་བ་འདིར་སྐྱོ་དང་གདུང་བ་སྐྱེས་འོང་། །

ནངས་ཞོགས་དཔེ་ཁུག་དང་ལང་ཚོ་ངོམ་པའི་བྱིས་པ།།
གློ་བུར་མུན་ནག་གི་ས་ཆེན་འོག་ཏུ་མནན་ཞིང་། །
སྨྲེ་སྔགས་གདུང་ཡུས་ཀྱི་རེ་འབོད་ཞུ་དབང་མེད་པར། །
བར་དོའི་འཕྲང་རིང་ལ་ཕྱིན་འདིར་འཚེར་སྣང་སྐྱེས་འོང་། །

ལས་དབང་འབྱུང་འཇུག་གི་རྒྱུ་བ་མ་སྙོམས་དབང་གིས།།
ཉེས་མེད་འགྲོ་ཚོགས་ཀྱི་ཚེ་སྲོག་ས་ལ་བརྡབས་སོང་།།
གདོང་དམར་བོད་པ་ལགས་སྙིང་སྟོབས་དཔུང་ཤ་ངོམ་སྟེ།།
རྡོག་རྩ་གཅིག་སྒྲིལ་གྱིས་རང་སྟོབས་རང་གིས་སྐྱེད་རོགས།།

ཆོས་ལྡན་ཞིང་ཁམས་འདིའི་མིང་སྲིང་སྟོང་ཕྲག་གང་མང་།།
སྣང་སྲིད་འཁོར་འདས་ཀྱི་བདེན་ལུགས་རྩོད་དབང་མེད་པར།།
རྟེན་འབྲེལ་ལུགས་ལྡོག་གིས་མྱ་ངན་ཐང་ཆེན་འགྲིམས་པར། །
ཡིག་དྲུག་དབྱངས་རྟ་དང་མིག་ཆུས་སྐྱེལ་མ་ཞུས་ཡོད། །

ཕྱི་རབས་གཞོན་སྐྱེས་ཀྱི་སེམས་ཤུགས་སླར་སྣོན་རྒྱོབ་དང་། །
ང་ཚོའི་རུས་ཤོག་འདི་མི་ཚང་གཅིག་ཏུ་འདུས་ཡོད། །
རླབས་ཆེན་ཁྱིམ་གཞིས་ཀྱི་དྲོད་ཁོལ་བསྐྱར་དུ་གསོས་ཏེ། །
འབྱུང་འགྱུར་བདེ་སྐྱིད་ཀྱི་གོམ་ཁ་རྒྱང་ལ་སྤོ་དགོས། །

༢༠༡༠.༤.༡༧

བོད་ཀྱི་སྡུག་བསྔལ།

སྤྱི་ཟླ༤པའི་ཚེས༡༤ཉིན་གྱི་ཞོགས་པའི་ཆུ་ཚོད་བདུན་དང་སྐར་མ་ཞེ་དགུའི་སྟེང་གི་སྐྱེ་རྒུ་མདོ་ལ་ཕུལ།
དགའ་དགའ།

གསོན་སྙིང་འདྲལ་ཞིང་གློ་མཆིན་གཅུ་བྱེད་པའི།།
དུས་ཀྱི་འཇིགས་པ་འོངས་པའི་ཉིན་མོ་ནས།།
མིག་མཐའི་མཆི་མ་གཞར་ཡང་སྐམ་མིན་པའི།།
སྡུག་གི་མཚོ་མོར་སྣོན་པ་སུ་ཡིས་བྱིན།།
ཉིན་མོ་གར་སོང་ས་ནས་ཁམས་མ་དྭངས།།
མཚན་མོའི་རྨི་ལམ་འགྲིམས་ཡང་བློ་མ་བདེ།།
གསར་འགྱུར་ཐན་ཐུན་ཐོས་དུས་གསོན་པོའི་སྙིང་།
ཐེར་ཚལ་སྦར་ཚལ་གཏོང་བ་སུ་ཡི་འཕྲུལ།།
ཕ་གསོད་ལག་དམར་མཐོང་ཡང་གཡས་ནས་བསྐྱུར།།
མ་གཏུབ་གཤེད་མ་རིག་ཀྱང་གུད་དུ་བོར།།
བཟོད་པའི་མ་ཐུབ་ཞེ་སྡང་ངར་མའི་མཚོན།།
གང་སར་གཡུག་པའི་སྙིང་ནད་སུ་ལ་རྩོད།།
ཙོག་པུར་བསྡད་ཀྱང་མགོ་ནས་སྙིང་ལ་འཐིབས།།
འགྲེང་ནས་བསྡད་ན་རྐང་ནས་རུས་ལ་ཟུག།
བསམ་ནས་བསྡད་ན་ཞ་རེངས་ནད་ཐེབས་ཚོད།།
སྡུག་འདི་སངས་བའི་ཐབས་འགའ་ཡོད་དམ་ཅི།།
བོད་པ་བོད་པ་ཧ་ཅང་ལས་ངན་སྟེ།།
བོད་པ་སྐྱེ་རྒུ་མདོ་ལ་སྡུག་བསྔལ་བྱིན།།
དུས་མཐའི་རྒུད་པའི་ལས་དབང་ཆེས་བཙན་ཡང་།།
ཀུ་རེ་འདི་ཡང་ཧ་ཅང་ཐལ་ཆེ་ལགས།།
རྒྱུ་འབྲས་རྙོག་པའི་ཁྱི་ཚང་བཙན་དང་གཅིག།
འབྱུང་བའི་སྤྱང་ལྟོགས་སྙིང་རྗེ་མེད་དང་གཉིས།།
གངས་ཅན་བོད་ལ་འཛོམ་པའི་ལག་རྗེས་ལ།།
ང་ཡི་སྐྱེ་རྒུ་མདོ་བ་ཁྱུད་མུད་བྱས།།
ཅི་ཞིག་ཉེས་སམ་བདག་གི་རིགས་ཀྱི་རྒྱུད།།
བྱམས་དང་སྙིང་རྗེས་ཁེངས་པས་ལན་ནམ་ཅི།།
ཅི་ཞིག་ཉེས་སམ་བདག་གི་རིགས་ཀྱི་རྒྱུད།།
དྲང་བདེན་ཡ་རབས་ཡིན་པས་བརླག་སོང་ངམ།
ང་ལ་སྲོག་ལན་སྤྲོད་ཅིག་གཤེད་མ་ཀྱེ།།
ཤི་བོའི་གྲངས་ཀ་སྤྲོད་ཅིག་དམེ་བོ་ཀྱེ།།
མདོ་སྟོད་སྐྱེ་རྒུ་མདོ་བའི་སྤུན་ཟླ་ཡིས།།
འཆི་བའི་མིག་གིས་ཅེར་རེར་སྒུག་ནས་ཡོད།།
མཆོད་མེ་སྦར་ནས་གསོལ་འདེབས་ལན་གསུམ་བྱས།།
དགེ་སྒྲུབ་ཅུང་ཟད་ཕྱི་མའི་ལམ་ལ་བསྐུར།།
གཤིན་ཐང་བྱེ་མ་སྐྱ་བོའི་ཉག་ག་ནས།།
ཕྱག་ན་པདྨོས་ལམ་སྣ་འདྲེན་པར་ཤོག།
ལས་དབང་སྐུད་པའི་གཅིག་ཏུ་འཐབ་པའི་སྐྱ།།
ཡང་ཡང་བཤིག་ཀྱང་མདུད་པ་མི་ཤིགས་པ།།
གངས་ཅན་བོད་པ་ཞིག་གི་རྣམ་ཤེས་ཀྱིས།།
སླར་ཡང་སྐྱེ་རྒུ་མདོ་ལ་འཛོམས་པར་སྨོན།།

༢༠༡༠ལོའི་སྤྱི་ཟླ༤ཚེས༡༦ཉིན།

རིག་པ་བསྒྲིམས་ཤིག་བརྩེ་བའི་ཡུལ་ཤུལ་བ།

དབུ་རུ་དོན་འདུར།

ཡོམ་ཡོམ་གཡོ་བ་རྨི་ལམ་མིན་ཀྱང་སྲིད།
འདར་འདར་འགུལ་བ་མིག་འཕྲུལ་མིན་ཀྱང་ངེས།
རེ་རེ་བཞིག་པ་ཁང་པ་ཡིན་ཀྱང་འདྲ།
སྐྱོ་སྐྱོ་མ་སྒུར་བརྩེ་བའི་ཡུལ་ཤུལ་བ།

འཛོམས་ནས་བྲལ་བ་དོན་དངོས་ཡིན་ཀྱང་འདྲ།
སྐྱེ་ནས་འཆི་བ་ངོ་མ་ཡིན་ཀྱང་ངེས།
གཏན་དུ་གྱེས་པ་ཚེ་སྲོག་ཡིན་ཀྱང་འདྲ།
རིག་པ་བསྒྲིམས་ཤིག་བརྩེ་བའི་ཡུལ་ཤུལ་བ།

ཕ་མ་བྲལ་ནས་དྭ་ཕྲུག་ལུས་ཀྱང་སྲིད།
བུ་ཕྲུག་སོང་ནས་རྒན་གོག་སྡོད་ཀྱང་ངེས།
འགྲོ་མི་ཚང་མ་བྲལ་བར་མི་གཟོད་ཀྱང་།
མིག་ཆུ་མ་གཏོང་བརྩེ་བའི་ཡུལ་ཤུལ་བ།

ཁྱིམ་ཚང་རྒྱུ་ནོར་ཐལ་བར་སློག་ཀྱང་རུང་།
ནང་མི་འཛོམས་པ་གཏན་བྲལ་བྱས་ཀྱང་འདྲ།
དུང་བའི་ཐག་སྣེ་བདུད་ཀྱི་བཟུང་ཟིན་ཡང་།
སྙིང་སྟོབས་སྐྱེད་ཤིག་བརྩེ་བའི་ཡུལ་ཤུལ་བ།

སྟོབས་འབྱོར་མངའ་ཐང་ས་ལ་བརྡབས་ཀྱང་རུང་།
ཉེ་དུ་སྤུན་ཟླ་ས་རྡོར་འདྲེས་ཀྱང་འདྲ།
འོག་ལ་བཅུག་པ་དུང་བའི་མ་ཡིན་ཀྱང་།
རིག་པ་བསྒྲིམས་ཤིག་བརྩེ་བའི་ཡུལ་ཤུལ་བ།

འགྲོ་མི་ཚང་མ་གཉེན་དང་ཉེ་དུ་རེད།
སྡོད་མི་ཀུང་ཀྱང་ཕ་མ་སྤུན་མཆེད་རེད།
ཆོས་ཉིད་རྒྱལ་མོས་རྡོག་རོལ་བཏང་ན་ཡང་།
ཡར་ལ་ལོངས་ཤོག་བརྩེ་བའི་ཡུལ་ཤུལ་བ།

ཕྱོགས་བཞི་མཚམས་བརྒྱད་རང་གི་སྤུན་ཟླ་རེད།
རོགས་མི་ཡོད་ཚད་རང་གི་ཕ་མ་རེད།
ལག་ཟུང་དྲོན་མོ་ཕྱོགས་ནས་བསྲིང་ཡོང་དུས།
སྙིང་སྟོབས་བསྐྱེད་ཤིག་བརྩེ་བའི་ཡུ་ཤུལ་བ།

འདུ་ནས་བྲལ་དགོས་འཁོར་བའི་རང་གཤིས་རེད།
སྐྱེས་ནས་འཆི་དགོས་དུས་ཀྱི་སྔ་ཕྱི་ཙམ།
རང་བྱུང་ཧམ་པས་མགོ་ནས་གནོན་ཡོང་དུས།
ཡར་ལ་ལོངས་ཤོག་བརྩེ་བའི་ཡུལ་ཤུལ་བ།

ངའི་མ་ཎི་ཡིག་དྲུག་གི་དབྱངས་བཅིབས་ནས་ཕེབས་རོགས་ཞུ།

མདའ་ཚན་པ།

ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ།
ཁྱེད་རང་བུད་སོང་།
ཁྱེད་རང་གློ་བུར་དུ་བུད་སོང་།
ཁྱེད་རང་མ་བསམ་ས་ནས་བུད་སོང་།
ཁྱེད་རང་གིས་འཇིགས་དངངས་དང་ན་ཟུག་ཅིག་ཁྱེར་ནས་བུད་སོང་།
ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ།
ཁྱེད་རང་གིས་བརྩེ་བ་ཕྱེད་ཀ་ང་ལ་བཞག་ནས་བུད་སོང་།
ངའི་བརྩེ་བ་ཕྱེད་ཀ་ཁྱེད་རང་གིས་ཁྱེར་ནས་བུད་སོང་།
ཁྱེད་རང་ཕྱིར་ཡོང་མེད་པར་བུད་སོང་།
ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ།
ངས་མ་ཎི་ཡིག་དྲུག་དབྱངས་སུ་གྱེར་ནས་ཁྱེད་རྗེས་ལ་ངུ་འབོད་བྱས།
ཁྱེད་རང་ངའི་མ་ཎིའི་དབྱངས་རྟ་ལ་བཅིབས་ནས་ཕེབས་རོགས་ཞུ
ངས་ཁྱེད་ཀྱི་ཆེད་དུ་མཚན་ཐུབ་མར་མེ་ཞིག་སྦར་ཡོད།
རྒྱུས་མེད་མུན་ནག་བརྒྱུད་ཕེབས་དུས།
ཁྱེད་ལ་ལམ་སྟོན་གྱི་སྒྲོན་མེ་ཉན་པར་ཤོག
ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ། ཨོྃ་མ་ཎི་པདྨེ་ཧྰུྃ།

སྐད་སྒྲ་མེད་པའི་མིག་ཆུ།

ཡུལ་ཤུལ་ས་ཡོམ་ཁྲོད་ཀྱི་གཤིན་གསོན་རྣམས་ལ་ཕུལ་བ།
གཡུ་སྲས།

ས་སྲོད་ཀྱི་བཙག་ཤད་དང་ཁངས་ཆར་འདྲེས་མའི་རྡོག་སྒྲ་དེས
སུ་ཞིག་གི་གདོང་ལ་གསུབ་ཐབས་བྲལ་བའི་རྟགས་ཐམ་དང་བཀའ་རྒྱ་བཏབ་ཅིང
ཞོགས་པ་གཞན་ཞིག་གི་སྐྱ་མདའི་ཀློང་ལ་རུས་རྐང་གཟེར་བའི་བུ་ལོན་བཀལ
ས་ཆེན་ཁྲོས་པའི་སྡང་མིག་གམ་གནམ་གྱིས་བསྐོས་པའི་གཙེས་རྒོལ་གང་ཡིན་མ་ངེས་མོད
ཡུལ་ཤུལ་དུ་རིགས་མཐུན་ཁྲི་སྟོང་མང་པོའི་གཅེས་པའི་ཚེ་སྲོག་རི་བོ་ལྟར་འགྱེལ་སོང
ཡུལ་ཤུལ་དུ་ཞེ་མཐུན་སྟོང་ཕྲག་མང་པོའི་རིན་ཆེན་མི་ལུས་འཇའ་ཚོན་ལྟར་ཡལ་སོང
ཡུལ་ཤུལ་དུ......

ངུས་ཀྱང་མིག་ཆུ་མེད་པ་ནི་མགྲིན་པ་བརྣངས་པའི་བདག་གི་མགོ་བོ་འདི་རེད
སྨན་ཁང་གི་གྲུ་ལོགས་ཤིག་ན་ཁ་ཁུ་སིམ་མེར
ཡུལ་གྱི་རྩེ་རོགས་དྲན་གི་ཟེར་བའི་བུ་མོ་བཀྲ་ཤིས་མཚོ་མོ་རེད
དགུང་ལོ་རེ་ལྔར་སོན་ཡང་བརྙས་སྨོད་ཀྱི་བཙན་རྒོད་ཐེབས་པའི་ཨ་མ་སྐྱིད་ལོ་རེད
གདོང་ཡོངས་རྨ་ཁས་ཁེབས་པའི་ཨ་ཕ་བཀྲ་ཤིས་རེད
བྲང་གཞུང་དང་བརླ་རྐང་འགུལ་རྒྱུ་མེད་པའི་ཕུ་བོ་དགེ་ལེགས་རེད
བུ་ཆེ་བ་ཕྱི་མར་བུད་སོང་ཟེར་བའི་ཕུ་བོ་དགེ་ལེགས་ཀྱིས
ངའི་གཟུགས་གཞི་དང་བྱད་བཞིན་ལ་ལྟ་བཞིན
ངའི་བུ་ཆེ་བ་ཁྱོད་དང་ལོ་ཚོད་མཉམ་པོར་ཡོད་ཟེར
ངས་ཚོད་ཚོད་ལ་གཤིན་རྗེའི་སྒོ་དྲུང་འགྲིམས་མཁན་དེ་རང་ཉིད་ཡིན་ན་བསམས་བྱུང

ཡུལ་ཤུལ་དུ བུ་མོ་མཚོ་མོ་ལྟ་བུའི ཨ་མ་སྐྱིད་ལོ་ལྟ་བུའི
ཡུལ་ཤུལ་དུ ཨ་ཕ་བཀྲ་ཤིས་ལྟ་བུའི ཕུ་བོ་དགེ་ལེགས་ལྟ་བུའི
ཁྱིམ་གཞིས་བྱ་སྒོང་བཞིན་བཅག་ཅིང་ཉེ་མི་མར་མེ་བཞིན་གཟིམ་ཚར་བའི
ཁྱིམ་མེད་ཀྱི་སྐྱེས་པ་དང་ཡུགས་མོ ཕ་མེད་ཀྱི་དྭ་ཕྲུག་ག་ཚོད་ཅིག་ལུས་ཡོད་ཨང

མོག་པོར་རྒྱུ་བའི་མཚན་མོའི་སྨག་རུམ་འདིས
ངའི་བསམ་གཞིག་གི་བར་སྣང་ཕྱེས་ཤིང
ཡུལ་ཤུལ་བའི་སྐྱ་ཐང་ཐང་གི་ངོ་གདོང་ཡོད་ཚད
དེ་རིང་གི་ཁངས་ཆར་ཁྲོད་ཀྱི་ཡུལ་ཤུལ་དང་འདྲ་བར
སེམས་བྱུང་ཁྲི་ཕྲག་གི་བང་རིམ་ནས་རྦབ་རྡོ་བཞིན་ཁོ་བོའི་བྲང་གཞུང་མནན་བྱུང

སྨན་ཁང་གི་གྲུ་ཟུར་ཞིག་ཏུ ཁོ་བོས་གཉོམ་དུང་ངེར
ཁྱིམ་མི་ཡོད་ཚད་གཤིན་ཡུལ་འགྲིམས་པའི་ཨ་ཅེ་སྒྲོལ་མའི་དངན་སྒྲ་ལ་ཉན་གྱིན
ད་རུང་ཡང་སྐྲ་ལོ་བཀྲུ་མི་ཉན་སྡུག་ལོངས་མེད་ཟེར་བའི
ཡུལ་ཤུལ་བའི་སྙིང་སྟོབས་དང་དད་ཞེན་མཐོང་བྱུང
ཚངས་ར་དང་སྒལ་ཚིགས་སིལ་བུར་གས་ཡོད་པའི་ནུ་བོ་དོན་གྲུབ་ཀྱི་ཞུ་ཚིག་ཕྲ་མོས
ཡང་བསྐྱར་གང་ནས་འགྱེལ་ན་དེ་ནས་ངེས་པར་དུ་ལངས་དགོས་པའི་གདམས་ངག་ཀྱང་རྙེད་བྱུང
ཡུལ་ཤུལ་བ དཔའ་རྟུལ་གྱི་ཕ་ས་ནས་དགྲ་མགོ་ཐོ་བོས་བརྡུངས་ཏེ
སྡུག་བསྔལ་གྱི་རི་རབ་གཙང་བོའི་ཕ་རོལ་དུ་སྐྱེལ་མཁན
སེམས་ལྗོངས་ཀྱི་སྨྲེང་གླུ་སྙིང་སྟོབས་ཀྱི་སྲོག་ཏུ་བསྒྱུར་མཁན
བདག་གིས་ཁྱེད་ལ་ཞེ་སེམས་གཙང་མས་གུས་འདུད་ཞུ
བདག་གིས་ཁྱེད་ལ་ཞེ་སེམས་གཙང་མས་གསོལ་འདེབས་ཞུ
བདག་གིས་ཁྱེད་ལ་ཞེ་སེམས་གཙང་མས་གདུང་འབོད་ཞུ

༢༠༡༠-༤-༡༨ཉིན་གྱི་དགོང་མོར་བྲིས།

གས་ཀ

སྤྱི་ལོ༢༠༡༠ལོའི་ཟླ༤པའི་ཚེས༡༤ཉིན་གྱི་ཡུལ་ཤུལ་ས་འགུལ་ལ་གདུང་སེམས་མཉམ་བསྐྱེད་དུ།
ཅོ་རིགས་འཇམ་དཔལ་སྐྱབས།

སྙིང་རྗེ་མེད་པའི་ཚད་རིམ༧.༡ཅན་གྱི་ས་ཡོམ་དེ
ཞོགས་པའི་ཆུ་ཚོད་བརྒྱད་ལ་མ་སླེབས་གོང་འགུལ་བྱུང
སྒེའུ་ཁུང་གི་དྲ་ཡོལ་ཕར་མ་ཕྱེས་གོང་འགུལ་བྱུང
ཞག་གང་བོའི་རྨི་ལམ་གྱི་གཙང་བོ་བརྒལ་མ་ཐག་འགུལ་བྱུང

གློ་བུར་གློ་བུར་དུ སྐད་ཅིག་སྐད་ཅིག་ལ
ཚེ་སྲོག་མང་བོ་ཞིག་གི་སྒྲོན་མེ་ལ་ཕུ་བཏབས་པ་ལྟར་ནུབ་ཚར
ཡུལ་ཤུལ་གྱི་མི་བུ་མང་བོ་ཞིག་མིག་ལམ་ནས་སྟོངས་ཚར
སུས་ཀྱང་བཟློག་ཐབས་བྲལ་བའི་རང་བྱུང་ཁམས་ཀྱི་འཇབ་རྒོལ་འདིས
སྟོངས་ཤིང་ཡལ་མ་ཐག་པའི་ཕ་དང་མ
ཡལ་ཤིང་སྟོངས་མ་ཐག་པའི་བུ་དང་ཚ་བོ་མང་བོ་ཞིག
མི་སྡུག་པའི་ཁྲག་གི་རྐྱེན་ལམ་དུ་བརྫངས
ད་ལྟ སྐྱེ་དགུ་རྩྭ་ཐང་གི་ལྗང་ལོ་གསར་བ་ཞིག་གི་རྩེ་ལ་ཁྲག་ཐིགས་འཛུམ

སེ་གོལ་གཅིག་གི་ཡུན་ལ་བསམ་དབང་དྲན་དབང་མེད་པར
ཨ་མའི་སེམས་རྟེན་དང་ཕུ་བོའི་དཔུང་རོགས་ཤོར་ཞིང
བོད་ཡུལ་གྱི་གྲུ་ཟུར་ཞིག་ལ་ཆག་འཇིག་གི་བརྡབ་གསིག་རབ་ཏུ་གཡོས
ད་ལྟ ཡུལ་ཤུལ་གྱི་ཆུ་མིག་དྭངས་མོ་ཞིག་གི་ནང་དུ་མཆི་མ་འཐོར

སྡུག་བསྔལ་གྱི་ཁ་བ་སེམས་ལ་སྤུངས་ཤིང
སྐྱོ་གར་གྱི་གཏམ་རྒྱུད་མི་ཡུལ་ལ་བཞག་པའི་ཉི་མ་ནག་པོ་འདི་ལ
བུ་མོ་ཞིག་གི་མིག་གི་ཆ་ག་ཉམས་སོང
སྦྲང་མ་ཞིག་གི་ལུས་ཀྱི་ཐིག་ལེ་འགྱུར་སོང
དཔྱིད་ཚིགས་ཤིག་ལ་འབྲི་མོ་གློ་བུར་དུ་ངུར
ད་ལྟ ཡུལ་ཤུལ་གྱི་གང་ས་གང་དུ་རྣམ་ཤེས་ཀྱི་བུ་ཡུག་འཚུབ

ངུ་ངག་གིས་གནམ་ས་བསྲེས་དུས
སྨུག་ལོང་གིས་རི་ལུང་ཁེབས་དུས
མཛའ་བརྩེའི་ཁྲག་རྒྱུན་ཞིག་བཞུར་ནས
ཕ་ལ་ཕྱིར་མིག་ཅིག་བསྲིངས་ནས
བར་སྣང་ལ་ས་རྡུལ་གྱི་མེ་སྟག་དམར་འཚུབ་སེ
ས་སྒང་གི་སྒལ་གཞུང་ན་སེན་འབྲེད་ཀྱི་ཤུར་མོ་བཀྲ

ཨ་མ་བོར་བའི་བྱིས་པ་མང་བོ་ཞིག
བུ་ཆུང་ཤོར་བའི་ཨ་ཕ་མང་བོ་ཞིག
ཟུག་གཟེར་རྒྱག་པའི་དབང་བོ་སྐྱོན་ཅན་མང་བོ་ཞིག
ཁྱིམ་ཚང་བརླགས་པའི་དབུལ་ཕོངས་བ་མང་བོ་ཞིག
འཕྲོ་རིམ་འཕྲོར སྐྱོ་གར་གྱི་ལོ་རྒྱུས་གསེང་ལ་འབྱོར་བྱུང
ད་ལྟ ལྕགས་སྐུད་དང་ཨར་འདམ་གྱི་འོག་ཏུ་མི་སྲོག་མང་བོ་ཞིག་ཁ་སྦུབས་སུ་བསྒྱེལ

སློབ་མ་མང་བོ་ཞིག་མཉམ་གཅིག་ཏུ་རྒྱང་ལ་ཡལ
ཐོག་ཁང་མང་བོ་ཞིག་དུས་གཅིག་ལ་རྡུལ་དུ་བརླགས
ལྷ་ཁང་མང་བོ་ཞིག་ཀྱང་གཞི་གཅིག་ཏུ་ས་ལ་འགྱེལ
ད་དུང ཚུལ་ཁྲིམས་གཙང་བའི་ཆོས་ལུགས་པ་མང་བོ་ཞིག་ཀྱང་ལྔ་ལམ་དུ་བསྐྱལ
མཚམས་འདི་ལ་ངས་ཕ་ཡུལ་དྲན་ན
དུས་འདི་ལ་ངས་ཨ་ཅེ་དྲན་ན
ལྷག་ཏུ ངས་དགེ་འདུན་པ་དག་དྲན་ན
འགྱོད་གདུང་གི་ཚོར་བ་འཁྱག་པ་ཆུ་དང་འདྲ
དུས་སྐད་ཅིག་མའི་ས་འགུལ་དེ་ཇི་འདྲའི་བཟོད་པར་དཀའ་ཨང

རྫ་སྐྱེ་དགུ སེམས་པ་མ་སྐྱོ
ལྷ་སྒྲུང་གི་རྩེད་ར་དང་འདྲ་བའི འཇིག་རྟེན་འདིའི
རྡོ་ལེབ་འོག་གི་གྲོག་ཚང་དང་འདྲ་བའི་འཚོ་ཐབས་རེ་རེ་ནི
མ་གཞི་ནས་བྱིས་དུས་ཀྱི་རྩེད་རྡོ་རེ་རེ་དང་འདྲ
རང་བྱུང་ཁམས་ཀྱི་ས་འགུལ་གྱི་འཇིག་པ་འདི་ལས
མི་མང་བོ་ཞིག་གི་འཚོ་སྡོད་ཀྱི་ནམ་མཁའ་ལ་གས་ཀ་ཤོར

ཡུལ་ཤུལ ཐེངས་འདིའི་ས་འགུལ་གྱི་གནོད་འཚེ་ལས
ཁྱེད་ཀྱི་བྲང་གཞུང་དུ་སོས་ཐབས་མེད་པའི་རྨ་ཁ་བརྐོས་ན་ཡང
ཁྱེད་ཀྱི་སྙིང་ཁོངས་ལ་རྫོགས་རྒྱུ་མེད་པའི་སྡུག་བསྔལ་བཞག་ན་ཡང
ཕམ་སེམས་མ་སྐྱེས རང་སེམས་མ་སྐྱོ
དེ་ནི་མིའི་རིགས་ཀྱི་རྨ་ཁ་དང་མི་རིགས་ཀྱི་ཕམ་ཁ་ཆེན་པོ་ཡིན་པས
ང་ཚོས་མཉམ་དུ་འཐབ་འཛིང་གི་སང་ཉིན་ལ
འོད་སྟོང་གི་དབུ་ཁྱུད་སླར་ཡང་འབྲི

ངའི་སྙིང་དང་འདྲ་བའི་ཡུལ་ཤུལ སེམས་པ་མ་སྐྱོ
ཁྱེད་ཀྱི་སྡུག་སྨྲེ་ལ་མིའི་རིགས་ཀྱི་ཕྱག་འཇུ་ཡོད
ཁྱེད་ཀྱི་ཡོད་ཚད་ལ་མང་མང་གིས་སྟོབས་ཤུགས་བཙིར
ཁྱེད་ཀྱི་གོད་ཆག་ནི་འུ་ཅག་ཐུན་མོང་གི་གོད་ཆག་ཡིན་པས
ཁྱེད་ཀྱི་ངོ་གདོང་བརྒྱུད་དེ་བར་མེད་དུ་བཞུར་བའི་མིག་ཆུ་དེ མི་རིགས་ཀྱི་བྲང་གཞུང་བརྟོལ་ཏེ་སེམས་ཁོངས་ན་ཡུལ་ཆུ་ལྟར་བཞུར་གྱིན་འདུག
ད་དུང སྙན་ངག་པའི་ཟུངས་ཁྲག་དང་མཉམ་དུ་སྨྱུག་རྩེ་ན་འབབ་ཀྱིན་འདུག

ཟླ༤པའི་ཚེས༡༦ཉིན་ཀླུ་ཆུའི་སྐྱ་ཚང་དུ་བྲིས།

ཁྱོད་ཚོ་ནམ་ཡང་ངའི་སེམས་ཁོངས་ན།

ཆུ་གཏེར།

སྐར་མ་འོད་ཆེན་གྱིས་ཉེན་བརྡ་གཏོང་དུས།
སྒོ་ཁྱིས་རེ་འབོད་ཀྱི་སོ་བལྟ་བྱེད་དུས།
ཡོད་ཚད་སྔ་ས་ནས་འགྱུར་ཟིན་པས།
མེ་རོ་སྙོམ་པའི་ཚེར་ས་དེ་ན།
གནའ་མིའི་འཚོ་བ་ལ་བརྒྱུས་པའི་རྩ་དྲི་མེད་ལ།
ཕ་སྐད་ཀྱིས་བརླན་པའི་གཤིས་ས་རང་ཤོར་རྐྱེན།
འབྲོང་གཡག་གི་ངུ་ངག་མཆོད་པའི་སྐར་མདའ།
གཡང་དཀར་གྱི་ལས་གདའ་ལ་འཐིམས་ཤིང་།
མདོ་བའི་འཚེར་སྐད་ཀྱི་བསམ་གཞིགས་སྐྱུར་མོ།
མི་ཚོགས་རྒོད་པའི་འདུ་ལོང་ལ་ཅེར་ནས།
དག་ཞིང་གི་འཚོ་བ་བསམ་བཞིན།
པོ་ཏ་ལའི་སྒོ་ཁའི་གཏམ་རྒྱུད་གླེང་བཞིན།
ཡུམ་བུ་བླ་སྒང་གི་ནང་མ་བཙལ་བར་ཆས།
ཡིན་ཡང་།
ཁྱོད་ཚོ་ནི་ནམ་ཡང་ངའི་སེམས་ཁོངས་ན།
མེ་རི་བཞིན་སྐྱོམས་པའི་ཚོགས་པ་ཞིག

མིག་ཆུ་དང་སྙན་ངག་གི་མཆོད་པ།

ནོར་བུ་མཛོད་པ།

སྙིང་རྗེ་བྲལ་བའི་རང་བྱུང་གི་གནོད་སྐྱོན་ཚབས་ཆེན་དེས།
ཡིད་ཆེས་དང་རེ་བས་གཏམས་པའི་ཚེ་སྲོག་གྲངས་མེད་ཀྱི་དབུགས་རྒྱུན་བཅད་སོང་།
རྨི་ལམ་འཕྲོག་སོང་།
ལྗང་མྱུག་ལྟ་བུའི་གཞོན་སྐྱེས་གང་མང་ཞིག་གིས་ཕ་གཞིས་བརླག་སོང་།
ཕ་མ་བགྲོང་སོང་།

སྐྱེ་འཆིའི་ལས་དབང་ལ་བཟློག་ཐབས་མེད་པ་ཆོས་ཉིད་དུ་ངེས་ཀྱང་།
སྤུན་ཟླའི་བརྩེ་སེམས་ལ་ནམ་ཡང་འགྱུར་བ་ཡོད་མི་སྲིད།
ང་ཚོས་སེམས་ཀྱིས་བྲིས་པའི་སྙན་ངག་དང་སྨོན་པ་ལྷ་ལ་བསྐུར་ནས།
འདས་པོར་བར་དོའི་འཕྲང་ལམ་ན་འཇིགས་སྐྲག་མེད་པའི་སྐྱབས་འཇུག་ཞུ།
ང་ཚོས་རེ་བས་འཛུམ་པའི་བྱམས་སེམས་ལག་རྡང་གཅིག་ཏུ་སྤྲེལ་ནས།
གསོན་པོར་བདེ་སྐྱིད་ཁྱིམ་གཞི་ཞིག་འཛུགས་པར་མཉམ་དུ་ཧུར་བརྩོན་བྱེད།

ཡིད་མ་ཕམ། བུ་དཔའ་པོའི་གཡུལ་ཤུལ་དུ་གྲགས་པའི་གདོང་དམར་བའི་བུ་རྒྱུད།
མི་སེམས་མཐུན་ན་འབྱུང་འགྱུར་ལ་མདུན་ལམ་ཡོད།
མཐུན་སྒྲིལ་འཛོམས་ན་ལས་དོན་ལ་སྟོབས་ཤུགས་ཡོད།

༢༠༡༠ལོའི་ཟླ་བཞི་བར་ཀན་ལྷོ་ནས།

ཡུལ་ཤུལ་ས་འགུལ་ལ་བྲིས་པའི་སེམས་ཀྱི་སྙན་ངག

བོང་སྟག་རི་ལུ།

སྤྱི་ཟླ་བཞི་བའི་ཚེས་པ་བཅུ་བཞི་ཉི་མ་ནག་ཅིང་ཟླ་བ་གནག །
ཚད་རིམ་བདུན་དང་གྲངས་ཆུང་གཅིག་གི་ས་འགུལ་ཆེན་པོ་བོད་ལ་ཐོན། །
ཁང་བརྩེགས་རབ་དང་རིམ་པ་ལོག་སྟེ་ཚེ་སྲོག་ཆེ་མ་ཆུང་གསུམ་བཅོམ། །
ཚེ་སྲོག་ཆེ་མ་ཆུང་གསུམ་བཅོམ་པས་སྡུག་བསྔལ་རབ་དང་རིམ་པ་བྱུང་། །

ཕ་མ་བོར་བའི་དྭ་ཕྲུག་མང་པོའི་ངུ་འབོད་སྐད་ཀྱིས་གནམ་ས་འགེངས། །
བུ་ཕྲུག་བོར་བའི་ཕ་མ་མང་པོ་བྲེལ་འཚུབ་སེམས་ཀྱིས་ག་སར་བརྒྱུག།
མདང་ནུབ་མལ་ས་གཅིག་ན་བདེ་བའི་ཕ་བུའི་རྨི་ལམ་ཞིམ་པོ་དེ། །
ད་ནི་གློ་བུར་སོ་སོར་ཁྱེར་ནས་འདི་ཕྱི་གཉིས་ཀྱི་མཚམས་ལ་བསྐྱལ། །

བདག་གི་ཕ་ནི་འདི་ན་མི་འདུག་བདག་གི་མ་ནི་འདི་ན་འདུག །
བདག་གི་མ་ནི་འདི་ན་མི་འདུག་བདག་གི་ཕ་ནི་དེ་ན་འདུག །
ས་དང་རྡོ་བ་རེ་རེ་སློག་དུས་ཤི་མ་གསོན་གྱི་བེམ་པོ་རེ། །
ཤ་དང་རུས་པ་བར་མེད་བརྡུངས་ཏེ་དམར་པོ་ཁྲག་གིས་སྦགས་པ་མཐོང་། །

དེ་དུས་བདག་གི་ཡ་ཆུང་སེམས་ཀྱིས་འདི་ནི་རྨི་ལམ་ཨེ་ཡིན་བསམ། །
དེ་དུས་བདག་གི་ཁྲ་ཆུང་མིག་གིས་དེ་ནི་མངོན་སུམ་ཨེ་ཡིན་བསམ། །
དེ་དུས་བདག་གི་དར་ལུང་རྣ་བས་ད་དུང་བདག་ལ་ཅོ་འདྲི་བྱེད། །
ཐོས་ཡང་ཐོས་ལ་མཐོང་ཡང་མཐོང་ལ་བདེན་ཡང་བདེན་པ་འདི་སྐྱོ་ཨང་། །

རྒུད་སྐྱོབ་མི་ནི་སྨན་དང་བཅས་ཏེ་ཕྱོགས་དང་ཕྱོགས་ནས་ཐོན་ན་ཡང་། །
རྒུད་སྐྱོབ་མི་ནི་འཇོར་དང་བཅས་ཏེ་གང་དང་གང་ནས་ཐོན་ན་ཡང་། །
རྒུད་སྐྱོབ་མི་ནི་ཟས་དང་བཅས་ཏེ་ཕྱོགས་དང་ཕྱོགས་ནས་ཐོན་ན་ཡང་། །
ད་ལྟ་བདག་གི་ཁྱིམ་གཞི་སྟོངས་ཤིང་བདག་གི་ནང་མི་ཚར་ནས་འདུག །

རེ་འགར་ལྷག་ཀྱང་རེ་འགར་འདུག་པ་མིག་ཡས་ཡོད་ཀྱང་རྣ་ཡས་མེད། །
རེ་འགར་ལྷག་ཀྱང་རེ་འགར་འདུག་པ་ཕ་མ་ཡོད་ཀྱང་ཕུ་ནུ་མེད། །
རེ་འགར་ལྷག་ཀྱང་རེ་འགར་འདུག་པ་ཁྱོ་ག་འདུག་ཀྱང་ཆུང་མ་མེད། །
མདང་ནུབ་དགའ་དགའ་སྐྱིད་སྐྱིད་རོལ་བའི་ཁྱིམ་གཞི་ཞིག་ཀྱང་འདི་ལྟར་སྟོངས། །

ཕ་མ་མང་པོའི་མིག་ཆུ་དྲུད་དེ་བུ་ཕྲུག་མང་པོའི་བེམ་པོར་འཐམ། །
བུ་ཕྲུག་མང་པོའི་རང་ཁྱིམ་བསྐྱུར་ནས་མི་འདོད་ཕྱི་མའི་འཕྲང་རིང་འགྲིམས། །
སོང་བའི་མི་ནི་ཕྱི་འགྱོད་དང་བཅས་བར་དོའི་འཕྲང་ན་འཇིགས་ཤིང་འཁུམས། །
ལུས་པའི་མི་ནི་གདུང་སེམས་དང་བཅས་མི་ཡུལ་ཁམས་ན་དངངས་ཤིང་འདར། །

ས་བརྐོ་རྡོ་སློག་ང་ཚོའི་མ་བྱས་ས་གཞི་འདི་ལ་སེམས་མི་འདུག །
རི་ཆུ་ནགས་གསུམ་ང་ཚོའི་མ་བཅོམ་རི་ཆུ་འདི་ལ་ཅི་བྱུང་སོང་། །
གཞན་ལ་གནོད་པ་ཅི་ཡང་མ་བྱས་ཚུར་ལ་རྒོལ་ལན་སློག་པ་འདི། །
སྐྱེ་བ་སྔོན་གྱི་ལས་དབང་ཡིན་ན་ལས་འདི་ཇི་འདྲའི་སྡུག་པ་ལ། །

སྐྱོ་ཨོ་སྐྱོ་ཨོ་སྤྲོ་སྐྱིད་ལྡན་པའི་ཁྱིམ་གཞི་ཞིག་ཀྱང་འདི་ལྟར་སྟོངས། །
སྡུག་གོ་སྡུག་གོ་འདི་ཕྱི་གཉིས་ན་སྡུག་བསྔལ་མྱོང་བའི་མི་དག་སྡུག །
འཁྲེང་ངོ་འཁྲེང་ངོ་ཁ་སང་བོར་བའི་ཕ་ཁྱིམ་དེ་ལ་ཇི་འདྲའི་འཁྲེང་། །
བྲལ་ལོ་བྲལ་ལོ་ཕ་མར་བྲལ་བའི་སེམས་འདི་ད་ནི་གཅིག་པོར་ལུས། །

༢༠༡༠. ༤. ༡༥

སྟོང་བའི་དབྱིངས་ལ་བཏབ་པའི་མགུར།

པ་ཐུར།

བདུད་དཔུང་གཤེད་མའི་ལས་ཀྱི་མཚོན་ཆ།།
གཟུགས་མེད་སྲིན་པོའི་འཁོར་ལ་འཁྲིལ་ནས།།
བརྩེ་མེད་མཆེ་བའི་ཁ་གདངས་རི་མོ།།
གངས་རིའི་སྙིང་གི་བྲང་ལ་གཏད་སོང་།།

སྤྱིར་ན་ཕན་བདེ་གཞི་ལ་བཅོལ་བའི།།
གངས་རིའི་ཆོས་ཀྱི་ཞིང་ས་འདི་ཡིས།།
རང་བྱུང་ལས་ཀྱི་རི་མོའི་ཁམས་འདི།།
གཅེས་འཛིན་སྲོག་གི་འཆིང་ཐག་བརྒྱབ་ཡོད།།

ཡིན་ཡང་ས་འགུལ་རླུང་ཤུགས་ཕྲ་མོས།།
ས་གཞི་རི་བོའི་ཁོངས་ལམ་གས་ཅིང་།།
སེམས་ཅན་སྲོག་གི་དབུགས་ཐག་མཉེན་མོ།།
གློ་བུར་སྙིང་གི་རྩ་ནས་བཅད་སོང།།

ཕ་བསད་བུ་ངུ་འཇིགས་པའི་ཁྲོམ་རྭ།།
བུ་ཤི་མ་ངུ་སྐྱོ་བའི་དུར་ས།།
དམྱལ་བ་གམ་བཅར་གཤིན་རྗེ་འཕྲང་རིང་།།
མིག་མདུན་ཀླད་ལ་བསྐོར་དོན་ཅི་བྱུང་།།

ས་རྡོ་རི་བརྡིབས་མེ་འོབས་གཏིང་འོག།
ང་དང་ནུ་བོའི་ཕ་སར་བསྒྱུར་ན།།
རྟེན་དང་བརྟེན་པོའི་དགྲ་འཇོམས་དཔུང་ཚོགས།།
མིག་ཞར་ལག་འཁུམས་གང་ལ་བཞུར་སོང་།།

ལྷ་ཀླུ་གཉན་གསུམ་འཁོར་གྱི་གྲོགས་ལ།།
ཟས་ཀྱི་ཕུད་རྐོང་མཆོད་ལ་མ་བསྐམས།།
གོས་ཀྱི་དར་ཡུག་རྡང་ལ་མ་འཆད།།
སྤྲིན་ནག་སྣོལ་མར་འཁྱུག་དོན་ག་རེད།།

ཁུ་ཚུར་ས་བརྐྱངས་རྡུང་ལ་རྔམས་མེད།།
རྐང་བ་གནམ་གཏད་དཔངས་ལ་མ་བསྲིངས།།
ངན་གཡོ་རྫས་ཀྱི་ཁྲི་ལ་མ་གཏད།།
ལན་ཆགས་འབྲས་བུ་གང་གིས་བྱིན་སོང་།།

ཀྱེ་མ་ཀྱེ་ཧུད་གཤིན་རྗེ་བདུད་པོ།།
ཁྱོད་སྙིང་ཁྱི་ཡི་གློ་བ་མིན་ན།།
ཉམ་ཐག་ཟ་བའི་ཁྲག་གི་མཆུ་འདི།།
སྡིག་ཅན་དམར་བོའི་དྲག་ཤུལ་མིན་ནམ།།

ཡོད་ཡོད་འདྲ་བའི་རྒྱུ་འབྲས་མེ་ཏོག།
མེད་མེད་འདྲ་བའི་སད་ཀྱིས་བཅོམས་ཚེ།།
བུ་ཆུང་སྙིང་གི་དད་གསུམ་དྲོན་མོ།།
འཁྱགས་ཀློང་བསྡམས་པའི་གཏིང་ལ་བཅུག་ཐལ།།

ཤུལ་ན་གསོན་ཅིང་རྨས་ཀྱིས་བརྫིས་པའི།།
བདག་གི་གྲོགས་དང་གཅེས་པའི་སློབ་ཕྲུག།
སྤྱན་ཟུང་མ་ལྷོད་གསོན་ལ་དམིགས་ཅིག།།
བསྡོངས་གྲོགས་མང་པོའི་རྒྱབ་ན་བསྐྱོར་ཡོད།།

གང་ལྟར་སྲོག་གི་རྒྱུན་ཐག་བཅད་པའི།།
གངས་ཅན་ཡུལ་ཤུལ་གྲོང་གི་སྤུན་ཟླ།།
བར་དོའི་འཕྲང་ལམ་འགྲིམས་པའི་རིགས་ལ།།
སྐྱོ་མགུར་དྲན་པའི་གཞས་འདི་ཕུལ་ལོ།།

འོད་ཟེར་ནག་པོ།

༤༡༤ དོན་རྐྱེན་ཁྲོད་ཀྱི་ངའི་ཕུ་ནུ་མིང་སྲིང་དག་ལ་ཕུལ་བ
ལྷམ་ཀོག

ས་གཞི་རི་རབ་འགུལ་བའི་དངངས་སྐྲག་གིས།།
ཕ་མ་བུ་ཕྲུག་སོ་སོར་ཕྱེས་པའི་སྙིང་།།
དྲག་ཏུ་འཕྱོ་ཞིང་དྲག་དུ་སྐྱོམས་པའི་ཚེ།།
བླ་མ་སྤྱན་རས་གཟིགས་ཀྱིས་ཐུགས་རྗེས་སྐྱོངས།།

གྲང་དང་མནར་བའི་སྡུག་གིས་ཡོངས་འཚེ་ཞིང་།།
ལྟོག་དང་བཀྲེས་པའི་མུ་གེ་བྱུང་བ་ན།།
གང་ལ་རེ་བའི་མིག་ཟུང་གཏོད་པའི་དུས།།
བླ་མ་སྤྱན་རས་གཟིགས་ཀྱིས་མགོན་སྐྱབས་མཛོད།།

གཅེས་ཤིང་ཕངས་པའི་ལང་ཚོ་བོར་བ་དང་།།
དྲོད་ཁོལ་འཛོམས་པའི་གཞི་ཁྱིམ་གཏོར་བའི་ངང་།།
ཡིད་ཀྱི་གཏད་སོ་བྲལ་བའི་འཇིགས་སྐྲག་ཀུན།།
བླ་མ་སྤྱན་རས་གཟིགས་ཀྱིས་སེལ་བར་སྨོན།།

ཕ་ཡིས་བུ་གཏོར་བུ་ཡིས་ཕ་གཏོར་ཞིང་།
བུ་མོས་མ་གཏོར་མ་ཡིས་བུ་གཏོར་ནས།།
སྐྱོ་བའི་འོ་དོད་རིང་མོས་ས་འགུལ་དུས།།
བླ་མ་སྤྱན་རས་གཟིགས་ཀྱིས་བརྩེ་བས་གཟིགས།།

ལས་ཀྱིས་བདས་ཤིང་རྐྱེན་གྱིས་ཉེར་བཟོས་པའི།།
མི་འདོད་དམྱལ་བའི་སྡུག་བསྔལ་མངོན་སུམ་དུ།།
ཨར་འདམ་གསེབ་དང་ཟོམ་ན་མྱོང་བའི་དུས།།
གྲུ་འཛིན་མགོན་དེས་ཐུགས་སྐྱེད་བདག་གིར་བཞེས།།

ཀྱེ་ཧུད་མགོན་དང་དཔུང་གཉེན་བྲལ་བ་ཡི།།
ཉམ་ཐག་འགྲོ་ཀུན་འདི་ཀོ་ཡལ་བོར་ནས།།
བདེ་དང་སྐྱིད་པའི་ངང་དུ་འཚོ་འདོད་དག།
བསྟན་དང་སྟོན་པར་དཀར་བའི་གཏམ་དེ་རྫུན།།

རིགས་ཀྱི་ཆེ་བས་གཅིག་ཏུ་ཉེར་བཅིངས་ཤིང་།།
བྱམས་དང་བརྩེ་བའི་དམ་ཚིག་གཙང་བ་ཀུན།།
གཏོང་དང་ཡངས་པའི་སྒོ་གླེགས་འབྱེད་པ་ལ།།
ལྷག་སེམས་སེམས་བསྐྱེད་དྲག་པོས་མཐུན་འགྱུར་མཛོད།།

དེ་ལྟའི་ཡིད་ལ་གདུང་བའི་ཁུར་ལྕི་ཡང་།།
བསོད་ནམས་ཚོགས་གཉིས་གསར་དུ་གསོག་པའི་ཐབས།།
ལག་ཏུ་བསྟར་བའི་མངོན་འདོད་སྒྲུབ་སླད་དུ།།
གང་ལ་འཚམ་པའི་དན་རྟགས་མ་ནོར་ཞིག།

ཁོག་གི་སྙིང་དང་དཔྲལ་བའི་མིག་བཞིན་དུ།།
འབྲལ་བར་མི་ཕོད་ང་ཡི་ལྕམ་སྲིང་ཀུན།།
དེ་རིང་གློ་བུར་གསོན་བྲལ་བྱས་པ་འདིར།།
མཆི་མ་མི་འདོན་སེམས་དེ་རྡོ་ལས་བྱས།།

གཟུགས་ཅན་མི་དང་གཟུགས་མེད་ལྷ་ཡི་དཔུང་།།
དངོས་ཤུགས་རྒྱུད་གསུམ་རེག་དང་འཕྲད་པ་ལས།།
མཐུ་དང་ནུས་པའི་བདེན་སྟོབས་མ་ལྷོད་པར།།
སྐྱོབ་དང་སྐྱབས་ཀྱི་འཕྲིན་ལས་དང་དུ་ལོངས།།

སྨུག་སྤྲིན་དང་ལྷན་དུ་བསྡོངས་པའི་ངའི་སྨྲེང་སེམས།

བྱ་དོར་ཕུན་ཚོགས་དབང་ཕྱུག

རླུང་འཚུབ་དེ་གང་ནས་ལྡང་སོང་བ་ཡིན།
ས་སྒུལ་དེ་ཅི་ཕྱིར་འཕྱུར་ཡོང་བ་ཡིན།
བར་ཆད་དང་སྐྱོ་གདུང༌།
བཙན་གནོན་དང་ན་ཟུག
མདོར་ན། སྡུག་བསྔལ་དང་གོད་ཆགས་ཀྱི་སྨག་རུམ་ཁོ་ནས།
གངས་དཀར་གྱི་བཞིན་རས་བསྒྲིབས་དགོས་དོན་ཅི།
རྩྭ་ཐང་གི་མཛེས་སྡུག་བཅོམ་དགོས་དོན་ཅི།
གདོང་དམར་བའི་ཚེ་སྲོག་འཕྲོག་དགོས་དོན་ཅི།

གནམ་རྒན་མ། ཁྱོད་ཀྱིས་རྒྱུ་འབྲས་ཀྱི་མཁར་རྫོང་སྲུང་མྱོང་ངམ།
ཉམ་ཐག་གི་ལས་དབང་ཟེར་བ་ཨེ་རིག
དྲང་བདེན་གྱི་བདེན་རྒྱབ་འབོད་པ་ཨེ་ནུས།
མི་ཡུལ་གྱི་འོ་དོད་བྱ་བ་ཨེ་ཐོས།

ཁ་སང༌། ཉི་མ་ནུབ་རིར་བགྲོད་པའི་དུས་ཚིགས་སུ།
སྨུག་སྤྲིན་དང་ལྷན་དུ་བསྡོངས་པའི་ངའི་སྨྲེང་སེམས།
ཧི་མ་ལ་ཡའི་སྒལ་ཚིགས་ཁད་ཀྱིས་བརྟོལ་ནས།
སྐྱེ་རྒུ་མདོའི་བྲང་གཞུང་སྐྱ་མོར་སྙེག་སྐབས།
གནས་དེའི་འཇིགས་སྐྲག་གིས་ང་རང་བཅུམས་ཤིང༌།
ཕུ་ནུ་ཚོའི་མིག་ཆུས་ངའི་ཡོད་ཚད་གཙང་པོ་ལྟར་བཞུར་བྱུང༌།

གྲོང་ཚོ་རེ་རེ་ཁྲག་གིས་འཚོས་ཤིང༌།
ལུང་གཞུང་ཐམས་ཅད་ཀེང་རུས་ཀྱིས་འཚེངས་དུས།
ངའི་རྣམ་ཤེས་རླུང་གིས་གཡོས་པའི་དར་ལྕེ་འམ།
ངའི་སྨོན་ལམ་ཆུ་ཤུགས་ཀྱིས་སྐྱོམ་པའི་མ་ཎི་འཁོར་ལོ་ལྟར།
འཛམ་གླིང་གི་ཕྱི་ནང་གང་སར།
ཡིག་དྲུག་གི་རོལ་དབྱངས་ས་སྒུལ་བཞིན་འདར་ཡོམ་ཡོམ་ངང་ གྱེར་བཞིན་ཡོད།།

རང་བྱུང་ཁམས། ང་ཚོར་གོད་ཆགས་འདི་ཡོང་མི་འོས།

རྔ་བ་རྒྱལ་ཁམས་པ། ཨ་རི།

དེ་རིང་། ངའི་མིག་ཀོང་མཆུ་མས་གང་བས། ལམ་ཁའང་གསལ་བོར་མ་མཐོང་།
དེ་རིང་། ངའི་མགྲིན་པ་སྐྱོ་ངག་གིས་བརྣངས་བས། སྨྲ་བརྗོད་ཀྱང་གསལ་བོར་མ་ཐོན།
དེ་རིང་། ངའི་ཡ་ཁོག་སྐྱོ་སྣང་གིས་གཟིར་བས། ཡོད་ཚད་ལ་ཡི་ག་མི་འདུག
རང་བྱུང་ཁམས་འདིས་ང་ཚོར་སྡུག་ཐོག་སྡུག་བཞག་གི་གོད་ཀ་འདི་འདྲ་ཞིག་མི་འབབ།
ང་ཚོས་ལས་རྒྱུ་འབྲས་སྲུང་། བྱམས་སྙིང་རྗེ་བསྐྱེད།

གནའ་ནས་ད་བར།
ཁོར་ཡུག་འདིར་འཇམ་པོས་དར་གྱིས་གཡོགས།
སྙན་མོའི་ཚིག་གིས་བསྟོད།
ས་གཏེར་དང་ཆུ་གཏེར་གྲངས་མེད་ཅིག་སྦས།
རང་བྱུང་ཁམས།
ཁྱོད་གྱི་གཤིས་ཀ་ལྷ་དང་ལྷ་མོའི་རང་བཞིན་དུ་བཤད་པའི་ཆོས་རིག་གི་རྣམ་བཞག་གཏིང་རིང་བོ་དེ་མི་བསླུ་བ་ཡིན་ནམ།
ཁྱོད་ཀྱི་སྲོག་རྩ་མཐའ་ཡས་པའི་རྣམ་ཤེས་ཀྱི་ངོ་བོར་བཤད་པའི་རྡུལ་ཕྲན་གྱི་རིག་པ་དེ་བདེན་པ་ཡིན་ནམ།
ངས་བལྟས་ན། ང་ཚོས་ཁྱོད་ལ་འཛིན་པའི་དུང་དུང་གི་མོས་པ་དེ་ཕལ་ཆེར་ནོར་འདུག
རྒྱུ་མཚན་ནི། ཁྱོད་ཀྱིས་གནས་ལུགས་ལ་སྟངས་འཛིན་མ་ཤེས། རང་ཉིད་ཀྱི་སྤྱི་བོ་སྲུང་བའི་མི་རིགས་ཀྱི་གཤིས་ཀ་འདིར་།
འབབ་མ་འོས་པའི་གོད་ཆགས་ཤིག་དང་།
སྲན་མི་ཐུབ་པའི་མྱ་ངན་ཞིག་གིས་མནན་སོང་།

ངའི་སྙིང་ཉེ་བའི་སྐྱེ་རྒུ་མདོའི་སྤུན་སྲིང་ཚོ།
ཁྱེད་རྣམ་པ་ཡིད་མ་ཞིམ། ཁོ་མ་ཆད། སེམས་མ་སྡུག
གོད་ཁ་འདིས་ང་ཚོ་འཇིག་རྟེན་གྱི་མཐའ་ལ་གཏུགས་མེད།
ཁྱེད་ཅག་གིས་རང་ཉིད་བདག་མེད་ཁེར་རྐྱང་ཞིག་དང།
སྐྱབས་མེད་མགོན་མེད་ཅིག་ཡིན་སྙམ་དུ་མ་སེམས་རོགས།
ཁྱེད་ཅག་གི་ལུས་པོའི་ཕྱེད་ཀ་དེ་ང་ཚོ་ཡིན་ཞིང།
ང་རང་ཚོའི་གཟུགས་པོའི་ཕྱེད་ཀ་ནི་ཁྱེད་ཅག་རེད།
ང་ཚོས་རྒྱང་རིང་གི་ས་མཐའི་རི་ཀློང་དག་ནས།
ཁྱེད་རྣམ་པར་གདུང་སེམས་མཉམ་བསྐྱེད་དང་།
རོགས་སྐྱོར་གྱི་ལག་ཟུང་ཡངས་པོར་བསྲིང་ཡོང་།

༢༠༡༠ ༤ ༡༨

གོད་ཆག་བྱུང་བའི་སྤུན་ཟླ་རྣམས་ནམ་ཡང་སེམས་དབུས་ན།

འཇམ་མགོན།

ཡིག་དྲུག་གི་ཡིག་འབྲུ་རེ་རེ་ངག་ནས་བརྡོལ་སྐབས།
ངའི་སེམས་བྱུང་གི་བུ་ག་རེ་རེ་སུ་ཞིག་གི་རྣམ་ཤེས་ཡིན།
གང་ཞིག་གི་ལས་དབང་ཕྲེང་ཟུང་དང་བརྒྱུས་ནས་ཡོད།
མ་ཎྀ་འདོན་བཞིན་སྙིང་རྗེ་བཟློ་བཞིན།
འགྲོ་དྲུག་གི་ལས་དབང་ལ་བསམ་འདུ་ཕྱོགས་དུས།
ཨྃ་མ་ཎྀ་པདྨ་མེ་ཧཱྃ༔
འདི་ལྟར་ལམ་ལ་ཆས་སྔ་སོང་།
ཡིན་ཡང་བཟློག་མེད་ཀྱི་བར་ཆད་འདི་འདི་ལྟར་ཡོམ་པས།
གློག་ཞག་གི་གཤེད་ཐག་རིང་མོས་ཚེ་སྲོག་བསྡུས།
འོན་ཀྱང་། འདི་ན་ལུས་ངག་མཆོད་ཀོང་བཞིན།
མ་ཎྀ་མཆོད་མེ་བཞིན། ཁྱེད་ཅག་གི་རྒྱབ་མདུན་གང་རུང་ན་བྲལ་མེད་གནས།
ཁྱེད་རྣམས་བཞུད་ཤུལ་ན་ང་ཚོ་མྱ་ངན་ལྕི་ཡང་།
གདུང་འབོད་ཀྱི་མིག་ཆུ་མི་འབྱིན་ལ།
ཐབས་ཟད་ཀྱི་སྣང་བ་མི་འཁྱེར།
ཁྱེད་ཅག་གི་དོན་དུ།
རང་རིགས་ཀྱི་སླད་དུ།
མ་ཎྀའི་དབྱངས་རྟ་དྲོན་མོ་ཁྱེད་ཀྱི་གམ་ལ་འཕུར་ཡོད།
ཨྃྃ༌མ་ཎྀ་པདྨ་མེ་ཧཱྃ༔

༢༠༡༠ ༤ ༡༧

སྨྲེ་ངག

ར་རྒྱ་བློ་དབང་།

འབོད་སྒྲ་གནམ་ལ་འཁོར་བའི་གསོལ་འདེབས་ཤིག་བྱས་ཡོད། །
མིག་ཆུ་གཤོང་ལ་བཞུར་བའི་སྡུག་བསྔལ་ཞིག་བསྐྱེད་ཡོད། །
གཅིག་ཐོག་གཉིས་ལ་བརྩེགས་པའི་མྱ་ངན་གྱི་སྨྲེ་ངག།།
རང་བྱུང་ཆོས་ཀྱིས་བོད་ལ་སྐྱེས་ཐོབ་ཏུ་གནང་ངམ། །

པོ་ཏཱ་ལ་ཡི་ཐེམ་སྐས་ཁྲག་དམར་གྱིས་མ་སྐམ། །
ཁྲི་ཤོར་རྒྱལ་མོའི་རྦ་རླབས་ཞེ་འཁོན་གྱིས་བསྐྱོམས་ཡོད། །
རྨ་རྒྱལ་སྦོམ་རའི་དབུ་འཕང་སྡུག་རུས་ཀྱིས་འགྲེང་དུས། །
ས་ཡོམ་བདུད་ཀྱིས་ཆོ་འཕྲུལ་ཅི་ཞིག་ལ་བསྟན་ནམ། །

ལ་དང་ལུང་པ་སེམས་ཀྱིས་རྨུ་ཐག་གིས་བསྟད་ཡོད། །
ཆུ་དང་གཙང་པོ་བཀྲ་ཤིས་གསེར་ཟམ་གྱིས་བསྲུང་ཡོད། །
སྤང་དང་ནགས་ཚལ་ལྷ་ཀླུའི་ཞིང་བཀོད་ལ་བསྒོམས་ཡོད། །
ཅིའི་ཕྱིར་ལན་མེད་འཁོན་འགྲུས་བོད་མི་ལ་བྱུང་སོང་། །

མགོན་གྱི་དྭངས་མ་རྒྱང་རིང་ས་མཐའ་ན་བཞུགས་སྐབས། །
ཕ་མ་བུ་ངོ་མ་འཕྲོད་གྱེས་གདུང་ལ་ལྷུང་སྐབས། །
རིགས་ཀྱི་དཔའ་བོ་ཁྲི་མུན་དོང་རུམ་ན་ཡོད་སྐབས། །
མི་མཛའ་འབྱུང་བའི་ཁྲོ་གཏུམ་མཆེ་གཙིགས་ཀྱིས་སླེབས་བྱུང་། །

ཡིན་ཡང་གངས་རིའི་བུ་རབས་ཕམ་པ་ནི་མ་མཆིས། །
ས་ཡ་བྱེ་བའི་དཀའ་སྡུག་ཕྲག་སྟེང་དུ་ལེན་ནུས། །
རིག་གནས་གསར་བརྗེའི་མུན་དོང་སྙིང་སྟོབས་ཀྱིས་སློག་མྱོང་། །
སླར་ཡང་མུན་པའི་གཤེད་དུ་སྤོབས་སེམས་ཀྱིས་འགྱིང་ངེས། །
༢༠༡༠ ༤ ༡༧

ཡུལ་ཤུལ་ལ་མྱ་ངན་ཞུ་བ།

གཉན་པོ།

ཁྱེད་ཚོ་འཇིག་བཞིན་པ་དེ།
གངས་རི་ཉིལ་བཞིན་པ་དང་འདྲ།
མཚོ་མོ་བྲི་བཞིན་པ་དང་འཚུངས།
ཁྱེད་ཚོ་བཞུད་སྟངས་དེས་བདག་གི་སྙིང་སྒུལ་བྱུང་།
ཁྱེད་ཚོར་གྱེས་སྟངས་དེས་བདག་གི་སེམས་བསྲེགས་སོང་།
ང་ཡི་སྤུན་ཟླ་དག
ད་ནི་བདག་གིས་སུ་ལ་འཁང་ར་བྱེད་དགོས་སམ།
སུ་ཞིག་མགོན་དུ་འབོད་དགོས་སམ།
ཉིན་འདི་ཚོར་ཉི་འོད་ཀྱང་ཁྱེད་ཚོ་དང་ལྷད་དུ་བཞུད་ཟིན།
ཉིན་འདི་ཚོར་མིག་ཆུ་ཡང་སྐྱེ་རྒུ་མདོར་བཞུར་ཟིན།
ཉིན་འདི་ཚོར་ང་ལ་གནམ་མཁའ་མི་འདུག
སྤུན་ཟླ་གང་མང་ཞིག་ལ་ཕ་ཡུལ་མི་འདུག
མི་ཡུལ་གྱི་མཐའ་མཇུག་ལྟ་བུའི་དེ་རིང་།
སྤུན་ཟླའི་བརྩེ་སེམས་མིག་ཆུར་འདྲེས་ཤིང་།
གནམ་སའི་འོ་དོད་ཁྱེད་ཚོར་ཕུལ་ཡོད།
ངའི་སྙིང་ཉེ་བའི་སྤུན་ཟླ་ཚོ།
ད་ནི་བདག་གིས་དྭངས་གཙང་གི་མིག་ཆུ་འཁྱོར་བ་གང་ལས།
ཁྱེད་ཚོར་ཅི་ཞིག་ཕུལ་དགོས་སམ།
ད་ནི་བདག་གིས་འཐག་བཞིན་པའི་གདུང་དབྱངས་ཤིག་ལས།
ཁྱེད་ཚོར་ཅི་ཞིག་གྱེར་དགོས་སམ།
ངའི་སྙིང་ཉེ་བའི་སྐྱེ་རྒུ་མདོའི་སྤུན་ཟླ་ཚོ།

༢༠༡༠ ༤ ༡༦ ཉིན།

ས་ཡོམ་གོད་ཆག་ཁྲོད་ཀྱི་འདས་གསོན་སྤུན་ཟླ་ཕོ་མོ་ཚོར་མྱ་ངན་ཞུ་བ།

ཆུ་སྐྱེས་སྒྲོལ་མ།

བོད་ཁ་བ་རི་པའི་ལས་ངན་ལ་བསམ་ཚེ།།
དུས་དེ་རིང་དྭངས་ཡང་སང་ཉིན་དེ་འཐིབས་འོང༌།།
སྐྱབས་མགོན་མེད་གཞིས་བཞུགས་བོད་མི་ལ་བསམ་ཚེ།།
དུས་འབྱུང་བཞི་རབ་འཁྲུག་བར་ཆད་ཀྱིས་ཟིན་འདུག།

གནམ་སྔོན་པོ་ཡར་ལ་ལྷ་བླ་ཞིག་མཆིས་ཚེ།།
ངའི་རིགས་མཐུན་སྤུན་ཟླར་དགོངས་བཞེས་རེ་གནང་ནས།།
ཚེ་འཆི་ཁའི་ལམ་ནས་ལག་གདང་གིས་འདྲེན་རོགས།།
དམུ་ཐག་པས་འཐེན་ནས་ཐར་ལམ་ལ་འཁྲིད་རོགས།།

མ་ཨ་ཕ་བྲལ་བའི་བོད་ཕྲུག་ལ་བསམ་ཚེ།།
རང་གློ་སྙིང་བྲང་གསུམ་ན་ཟུག་དེ་ཆེ་ཡང༌།།
རྐྱེན་གེགས་བར་ཞི་བའི་སྨོན་ལམ་གྱི་ཞལ་འདེབས།།
ཡུལ་འཕགས་ཡུལ་གླིང་ནས་ཕུལ་བ་དེ་སྒྲུབ་ཤོག།

ནག་སྐྲ་ལོ་ཁ་བས་གཡོགས་པ་ཚོར་བསམ་ཚེ།།
སྡུག་མ་མྱངས་དགུ་མྱངས་ཚེ་མཇུག་དེར་མྱངས་འདུག།
གཉེན་བུ་ཕྲུག་བྲལ་བའི་གཅོང་སེམས་ཀྱི་ནད་གཞི།།
རྗེ་ལྷ་རྗེ་ཡོད་ན་མྱུར་དུ་རང་བཅོས་རོགས།།

ཕ་ས་ཁང་བརླག་པའི་སྤུན་ཟླ་ཚོར་བསམ་ཚེ།།
མལ་དྲོན་པོ་ཟ་བཏུང་བཀོལ་སྤྱོད་དེ་བོར་བའི།།
སེམས་དུ་ཁས་མནར་བའི་མྱ་ངན་གྱི་སྨུག་པ།།
དུས་སྐད་ཅིག་ཉིད་ལ་ལྷ་སྲུང་གིས་སེལ་རོགས།།

གྲང་ལྟོགས་སྐོམ་འཁྱག་གསུམ་བཟོད་མེད་ཀྱི་དཀའ་ཚེགས།།
དུས་ད་ལྟ་སེལ་ནས་དགའ་སྐྱིད་ཀྱི་དཔལ་ཡོན།།
སྡུག་ཁུར་པོས་གནོན་པའི་སྤུན་ཟླ་དེ་རྣམས་ལ།།
ཤར་ཉི་གཞོན་བཞིན་དུ་ལ་མོ་རུ་འཆར་ཤོག།
　
སྙིང་དམར་ཆུང་བྱུ་རུའི་གུར་ཁང་ལས་ཆས་པའི།།
སེམས་བཅོས་མེད་སྨོན་ལམ་དྭངས་མ་ཡི་འབྲས་བུ།།
ཁྱེད་སྤུན་ཟླའི་དཔག་བསམ་ལྗོན་ཤིང་གི་རྩེར་མོར།།
དུས་མི་རིང་སྨིན་ལ་ལྷ་ཚོགས་ཀྱིས་གཟིགས་རོགས།།
　
ཡུལ་ས་མཐའ་འགྲིམ་མཁན་བུ་མོ་ངས་ད་བར།།
ལས་བཟང་པོའི་དགེ་བ་ཅི་བསགས་ཀྱི་འབྲས་བུ།།
རིགས་རུས་རྒྱུད་གཅིག་པའི་སྤུན་ཟླ་ཡི་ཚོགས་ཀྱི།།
དོན་བར་ཆད་ཞི་བའི་གསོལ་འདེབས་སུ་བརྫངས་སོ།།

ངས་གོང་གི་ཚིགས་བཅད་འདི་དག་ཡིད་མ་སྐྱིད་པའི་ཚོར་སེམས་ཐད་ཀར་བྲིས་པ་ཡིན་པས། ཚིག་སྦྱོར་དང་རྒྱན་སྦྱོར་ལ་སྙན་ཆ་བྱུང་མ་སོང་ཡང༌། སེམས་ཀྱི་སྨོན་ཚིག་འདི་སྤེལ་ནས་ས་ཡོམ་གོད་ཆག་ཁྲོད་ཀྱི་འདས་གསོན་སྤུན་ཟླ་ཕོ་མོ་ཚོར་མྱ་ངན་ཞུ་བ་ཡིན།
༢༠༡༠ ༤ ༡༦

སྐྱེ་རྒུ་མདོ།

ཟ་ལེ་རྒྱལ།

སྐྱེ་རྒུ་མདོ། དད་པ་དང་དམ་ཚིག་བརྟན་ས་ཡིན
སྐྱེ་རྒུ་མདོ། ལས་འབྲས་ལ་ཡིད་ཆེས་ཡོད་ས་ཡིན
སྐྱེ་དགུ་མདོ། སྙིབ་རྗེ་ཆེ་ས་དང་མ་ནི་འདོན་ས་ཡིན
སྐྱེ་རྒུ་མདོ། ཐོབས་ཐང་མེད་ཀྱང་ཆོག་ཤེས་ཡོད་ས་ཡིན
སྐྱེ་རྒུ་མདོ། དམངས་གཙོ་མེད་ཀྱང་བཟོད་པ་སྒོམ་ས་ཡིན
སྐྱེ་དགུ་མདོ། རྒྱུ་ནོར་མེད་ཀྱང་སྦྱིན་པ་གཏོང་ས་ཡིན
སྐྱེ་རྒུ་མདོ། ས་བདག་གིས་ཐུབ་ཚོད་བྱེད་ས་ཡིན
སྐྱེ་རྒུ་མདོ། ངུ་ངག་ལ་རིན་ཐང་ཆུང་ས་ཡིན
སྐྱེ་རྒུ་མདོ། ཚེ་སྲོག་གིས་རྒྱང་འབོད་བྱེད་ས་ཡིན
སྐྱེ་རྒུ་མདོ། བོད་མིའི་སྐྱིད་སྡུག་མཉམ་མྱོང་གི་བདེན་དཔང་བྱེད་ས་ཡིན
སྐྱེ་རྒུ་མདོ། གཞིས་བྱིས་མཉམ་འཛོམས་ལ་ཚེ་སྲོག་གིས་འབོད་པ་བྱེད་ས་ཡིན།
སྐྱེ་རྒུ་མདོའི་ཚེ་སྲོག་གང་མང་ས་འོག་དུ་འཐུམས་པས་བོད་མི་ཚོར་ཆིག་བསྒྲིལ་གྱི་ནུས་བའི་དབུ་འཁྱུད་བྲིས
ལོ་རྒྱུས་ན་གསལ་བའི་སྐྱེ་རྒུ་མདོའི་རྣམ་ཤེས་འདི་དག་བོད་མི་རིགས་ཀྱི་མཆོད་རྟེན་ཡིན།

༢༠༡༠ ༤ ༡༧

སེམས་གཏིང་ནས་སྒྲོན་པའི་མཆི་མའི་མཆོད་མེ།

འདྲེ་རིག་ལྡན།

བསམ་དབང་དྲན་དབང་མེད་པའི་ས་ཡོམ་དེས
ཚེ་སྲོག་བརྒྱ་ཕྲག་ཅིག་རླུང་གིས་དེད་ཤུལ་དུ
ཞིག་རལ་དུ་གྱུར་བའི་ཁང་བརྩེགས་མང་པོ་ཞིག
བོད་མིའི་ངུ་འབོད་དང་འགྲོགས་ནས་གནམ་ངོར་གྱེར་ནས་འདུག

བཞུད་ཟིན་པའི་ཁྱེད་ཚོའི་རྣམ་ཤེས་ལ་ཕྱིར་འོང་ཞིག་ཡོད་ན
འཛམ་གླིང་ཡུལ་གྲུ་གང་ས་ནས་ལྷུང་དང་ལྷུང་བཞིན་པའི་མིག་ཆུ་འདི་དག
སུ་ཞིག་གི་ཁྲེལ་དགོད་གདོང་གིས་བསུས་པར་དོན་སྙིང་མེད་པ་ཞིག་ག་ལ་ཡིན

བདེ་བར་གཟིམས་ཤིག ངའི་སྤུན་ཟླ་ཚོ
བོད་ཡུལ་སྟོད་སྨད་བར་གསུམ འཛམ་གླིང་ཡུལ་གྲུ་སོ་སོ
བོད་མིའི་དབུགས་རྒྱུན་གྱིས་ཁྱབ་ཚད་ནས་འཚེར་བའི
འོད་ལམ་ལམ་གྱི་མིག་ཆུ་འདི་དག་གིས ཁྱེད་ཅག་ལ
བདེ་བ་ཅན་གྱི་ལམ་སྣ་སྟོན་པར་སྨོན

༢༠༡༠ ༤ ༡༦

མྱ་ངན།

འབྲོག་རུ་ཆོས་གྲགས།

ས་ཆེན་ཡོམ་ཡོམ་འདར་བའི་དུས་ཀྱི་ཚེ་སྲོག་སྟོང་གི་གཤེད་མ་དེས།།
ཕ་འཛོམས་མ་འཛོམས་ཁ་ཁར་བཏང་ནས་སེམས་པ་མང་བོ་སྡུག་ལ་སྦྱར།།
མགོ་ལུས་ཡོངས་སུ་ཁྲག་ལ་བརྫིས་ནས་ཁྱིམ་གཞིས་དྲོད་མོ་རྒྱང་དུ་བསྐྱལ།།
ང་ཡི་སྙིང་ཁུང་རུས་པའི་གཏིང་ནས་མྱ་ངན་དྲག་པོའི་གདུང་འབོད་ཞུ།།

ཉི་མ་རེ་ལ་ཤི་གྲངས་འཕར་ན་སེམས་ཀྱི་ན་ཟུག་ཇེ་མང་རེད།།
ས་ཡོམ་རྒྱུགས་པའི་ཡུལ་དངོས་མཐོང་ན་མིག་མཐའི་མཆུ་མ་ཇེ་མང་རེད།།
མིག་ལམ་རབ་རིབ་གྱུར་བའི་ཁྲོད་ནས་ཤི་བས་ལམ་སྣ་ཟིན་རྒྱུ་དང་།།
གསོན་པའི་བར་ཆད་སེལ་བའི་ཆེད་དུ་སྐྱབས་འཇུག་གྲངས་མེད་ཡང་ཡང་ཞུ།།

༢༠༡༠ ༤ ༡༩