ངའི་དུར་ཐོག་ནས་ཁྱི་ལྡོམ་ཚོར་ཕོ་བྲང་མ་བཞེངས།

ཟ་ལེ་རྒྱལ།

ས་ཡི་འགུལ་སྟངས་ཤིག་གིས་ངའི་རྩོམ་རིག་གི་ཁོར་ཡུག་ཞུགས་སོང
ས་ཡི་འགུལ་སྟངས་ཤིག་གིས་ངའི་སྙན་ངག་གི་ཁ་དོག་འགྱུར་སོང
རིག་པ་དྭངས་མོ་དེ་ས་ལ་འཐུམས་ཞིང་དྲན་འཆར་རྒོད་པོ་དེ་རླུང་གིས་ཁུར་སོང
མཐའ་ན་ཁ་ལྕེ་བདེ་མོ་དེའང་ཡུན་གྱིས་ལྐུགས་སོང
ཡོད་ཚད་ནག་འཐོམ་མེར་ཅི་ཡང་མི་དྲན་ནའང
ས་འོག་གི་ངུ་འབོད་དེར་ཉན་དེ་ང་རང་ད་དུང་འཇིག་རྟེན་ན་ཡོད་པའི་ཡིད་ཆེས་བརྙེད་ཡོད

ས་ཡི་འགུལ་སྟངས་དེས་གཉོམ་ཆུང་ཚོ་གྲལ་མཐའ་ནས་དྲུད་དེ་ཕྱིན་ཡང
ང་རང་འདི་ལྟར་ལྷག་སོང ཁྱི་ལྡོམ་འགའ་དང་མཉམ་དུ
ཚེ་རབས་ནས་ཚེ་རབས་ལ་བསགས་པའི་བུ་ལོན་དེ་ཆ་ཚང་སྤྲད་ཟིན་མོད
ད་ནི་ང་ལ་ཁྱི་ལྡོམ་འགའ་ལས་ཅི་ཡང་ལྷག་མེད
ཨ་ཕ་མེད་ལ་ཨ་མའང་མེད
མཐའ་ན་སྐོམ་ཆུ་འཐུང་བྱེད་ཀྱི་ཕོར་བ་ཙམ་ཡང་མེད

བློས་མི་ཐོང་བའི་ས་འོག་གི་ངུ་སྐད་དེར་ཉན་ནས་བསྡད་ཡོད
ཡིད་མི་ཆེས་བའི་ས་མཐའ་ཡི་ཁྱི་སྐད་དེར་སྐྲག་ནས་བསྡད་ཡོད

ངའི་ཨ་མས་མ་ནི་བསགས་པའི་ཁ་གྲངས་དེ་བསམས་ན
ངའི་ཨ་ཕས་རྒྱུ་འབྲས་བཤད་པའི་རྣམ་པ་དེ་དྲན་ན
ང་ལ་མ་ནི་འདོན་འདོད་མེད་ལ་རྒྱུ་འབྲས་གཙི་འདོད་ཀྱང་མེད
མཐའ་ན་ང་ལ་ངུ་འདོད་ཀྱི་སེམས་པ་དེའང་མེད
ཅི་ཡང་མི་དྲན་ནའང་དྲི་བ་ཞིག་ངའི་སེམས་ལ་ཡང་ཡང་འཁོར
སང་ཉིན་དུར་ས་ནས་ཁང་བརྩེགས་རྒྱག་གི་ཡིན་ཟེར
ཁང་བརྩེགས་དེའི་ནང་ནས་སུ་འདུག་དགོས་སམ
བེམ་པོ་དག་ས་གཞིར་འཐུམས་ཟིན་ལ་རྣམ་ཤེས་དག་རྒྱ་གར་ལ་འཕུར་སོང
ན་ནིང་གི་མི་ཡུལ་འདི་ན་འདྲེ་ལའང་མ་དགོས་བའི་ཁྱི་ལྡོམ་འགའ་ལས་ཅི་ཡང་ལྷག་མེད

ངའི་དུར་ཐོག་ནས་ཁྱི་ལྡོམ་ཚོར་ཕོ་བྲང་མ་བཞེངས
ངས་ས་བདག་དང་གནས་བདག་ཚོར་བཤད་ཀི་ཡིན
ཁོས་ཁྱོད་ཚོ་ཚང་མ་མཉམ་དུ་ས་འོག་ལ་འཇུག་གི་རེད
༢༠༡༠ ༥ ༡