ས་ཡོམ་ཁྲོད་ཀྱི་བོད།

འཆམ་ར་དྲི་མེད་རྒྱལ་མཚན།

ཨོྃ་མ་ཎི་པདྨེ་ཧཱུྃ༔ ཨོྃ་མ་ཎི་པདྨེ་ཧཱུྃ༔ ཨོྃ་མ་ཎི་པདྨེ་ཧཱུྃ༔
སེམས་ཁོང་གི་ན་ཟུག་ལྷ་ཡིས་གཟིགས་དང་།།
མི་གསོན་པོ་ས་རྡོའི་འོག་ལ་མནན་སོང་།།
ཁྲག་གིས་ས་གཞི་ཚོས་བྱུང་། མི་རོས་ལུང་བ་གང་བྱུང་།
ཨོྃ་མ་ཎི་པདྨེ་ཧཱུྃ༔ ཨོྃ་མ་ཎི་པདྨེ་ཧཱུྃ༔
འཕགས་མཆོག་སྤྱན་རས་གཟིགས་ཀྱིས་སྐྱབ་ཏུ་གསོལ། སྐྱབ་ཏུ་གསོལ
ས་ནག་པོ་ལ་སྙིང་རྗེ་མི་འདུག མི་གཉོབ་ཆུང་ལ་མགོན་སྐྱབས་མི་འདུག
སྙིང་དམར་པོ་རྡོ་ལུས་རྡུང་བྱུང་།།
རྣམ་ཤེས་གངས་ལ་འཁོར་སོང་།།
གངས་རི་མིག་ཆུ་ཤོར་བྱུང་།།
བོད་མགོ་ནག་མི་ཡི་ཟུངས་ཁྲག་རྒྱ་མཚོའི་གཏིང་ལ་བསྐྱིལ་སོང་།།

ཨོྃ་མ་ཎི་པདྨེ་ཧཱུྃ༔ ཨོྃ་མ་ཎི་པདྨེ་ཧཱུྃ༔ ཨོྃ་མ་ཎི་པདྨེ་ཧཱུྃ༔
མི་ཡུལ་གྱི་སྡུག་བསྔལ་ལྷ་ཡིས་གཟིགས་དང་།
བོད་མི་རིགས་སྒལ་ཚིགས་ས་དགྲས་བཅག་བྱུང་།
གངས་དཀར་རྩེ་ནས་ཉིལ་བྱུང་།
རུས་པའི་རི་བོ་ཆགས་བྱུང་།
ཨོྃ་མ་ཎི་པདྨེ་ཧཱུྃ༔ ཨོྃ་མ་ཎི་པདྨེ་ཧཱུྃ༔
འཕགས་མཆོག་སྤྱན་རས་གཟིགས་ཀྱིས་སྐྱབ་ཏུ་གསོལ། སྐྱབ་ཏུ་གསོལ།
ས་ནག་པོ་ལ་ངོ་ཚ་མི་འདུག མི་གཉོབ་ཆུང་ལ་རང་དབང་མི་འདུག
སྙིང་དམར་པོ་རྡོ་ལུས་རྡུང་བྱུང་།།
རྣམ་ཤེས་གངས་ལ་འཁོར་སོང་།།
གངས་རི་མིག་ཆུ་ཤོར་བྱུང་།།
བོད་མགོ་ནག་མི་ཡི་ཤ་རུས་ས་གཞིའི་གཏིང་ལ་སྦས་སོང་།།

༢༠༡༠ ༤ ༡༩