ཨ་མའི་རྨི་ལམ

ཡུལ་ཤུལ་ས་འགུལ་ཁྲོད་དུ་ཕ་མ་གཉིས་འདས་པའི་བུ་མོ་ཞིག་ལ་བྲིས་པ།
གཅན་མེ་སྟག

ནམ་རྒྱུན ང་རང་ཨ་མའི་རུམ་དུ་ཉལ་གོམས་པས
ནམ་ཡང་བདེ་ལྷོད་ལྷོད་ཀྱིས་གཉིད་དུ་ཡུར་བཞིན་ཡོད
ང་ནི་ཨ་མའི་སྙིང་གི་ཕྱེད་ཀ་ཡིན

ཞོགས་པ་འདིར ང་རང་གློ་བུར་དུ་སད་དུས
ངས་ཨ་མའི་ཞི་འཇགས་ཀྱི་རྔུར་སྒྲ་ཐོས་མ་བྱུང་ལ
ཨ་མའི་ཤ་དྲོད་ལས་མཆེད་པའི་བདེ་ལྷོད་ཀྱི་སྐྱིད་སྣང་ཀྱང་ཚོར་མ་བྱུང་སྟེ
སྐད་ཅིག་མའི་དྲན་ཚུལ་ཞིག་ལ
ཨ་མའི་རྨི་ལམ་ནི ཐག་རིང་ཐག་རིང་ཞིག་ལ་ཕྱིན་སྣང་སྐྱེས

གཉིད་ཐུན་གཅིག་གིས
ངས་རང་ཉིད་ཀྱི་ཨ་མ་བོར་ཞིང ཨ་མའི་རྨི་ལམ་བོར་ལ
ཞོགས་པ་རེ་རེར་ངའི་གཅེས་མིང་ནས་འབོད་པའི
ངག་འཇམ་འཇམ་གྱི་སྐད་སྒྲ་དེའང་བོར་སོང
སྐད་ཅིག་གི་དྲན་ཚུལ་ཁྲོད
ངས་ང་རང་ཡང ཐག་རིང་ཐག་རིང་ཞིག་ལ་བོར་སྣང་སྐྱེས

ལས་འབྲས་ཞེས་པ་ལ་ང་གཏན་ནས་ཡིད་མི་ཆེས་ཏེ
ངས་ད་དུང་འཇིག་རྟེན་གྱི་བདེ་སྡུག་འགྲིམས་མ་མྱོང་ཞིང
ངས་ད་དུང་འཁོར་བའི་མཐའ་མཇུག་གི་བདེན་པ་རྙེད་མ་བྱུང་བས
རྒྱུ་མེད་ཀྱི་ལས་དབང་འདིས
ངའི་ཨ་མའི་རྨི་ལམ་གྱི་མཛེས་སྣང་གང་དུ་ཁྱེར

དེ་རིང
ངས་ཨ་མའི་རུམ་ཁ་ན་ལྷག་པའི་དུངས་བརྩེ་དེ་འཚོལ་ཕྱིར
ངས་ཨ་མའི་འཁུར་ཚོས་ན་འཛུམ་པའི་སྐྱིད་ཀོང་དེ་མཐོང་ཕྱིར
ངས་ནུས་ཤུགས་སྒོང་ནས་ཨ་མ་འབོད་བཞིན་ཡོད

གནམ་རྒན་མ་ཡ ཐལ་རྡུལ་དང་སྨུག་པ་འདི་ཡིས
ངའི་མིག་ལམ་གྱི་འཇིག་རྟེན་མ་གཡོགས་དང
ངས་རང་གི་སེམས་གཏིང་གི་ཨ་མ་དང
ཨ་མའི་ཞི་འཇམ་གྱི་རྨི་ལམ་ཅིས་ཀྱང་འཚོལ་དགོས་ཡ

༢༠༡༠ལོའི་ཟླ༤་པའི་ཚེས་༡༦ཉིན།