གོད་ཆག་བྱུང་བའི་སྤུན་ཟླ་རྣམས་ནམ་ཡང་སེམས་དབུས་ན།

འཇམ་མགོན།

ཡིག་དྲུག་གི་ཡིག་འབྲུ་རེ་རེ་ངག་ནས་བརྡོལ་སྐབས།
ངའི་སེམས་བྱུང་གི་བུ་ག་རེ་རེ་སུ་ཞིག་གི་རྣམ་ཤེས་ཡིན།
གང་ཞིག་གི་ལས་དབང་ཕྲེང་ཟུང་དང་བརྒྱུས་ནས་ཡོད།
མ་ཎྀ་འདོན་བཞིན་སྙིང་རྗེ་བཟློ་བཞིན།
འགྲོ་དྲུག་གི་ལས་དབང་ལ་བསམ་འདུ་ཕྱོགས་དུས།
ཨྃ་མ་ཎྀ་པདྨ་མེ་ཧཱྃ༔
འདི་ལྟར་ལམ་ལ་ཆས་སྔ་སོང་།
ཡིན་ཡང་བཟློག་མེད་ཀྱི་བར་ཆད་འདི་འདི་ལྟར་ཡོམ་པས།
གློག་ཞག་གི་གཤེད་ཐག་རིང་མོས་ཚེ་སྲོག་བསྡུས།
འོན་ཀྱང་། འདི་ན་ལུས་ངག་མཆོད་ཀོང་བཞིན།
མ་ཎྀ་མཆོད་མེ་བཞིན། ཁྱེད་ཅག་གི་རྒྱབ་མདུན་གང་རུང་ན་བྲལ་མེད་གནས།
ཁྱེད་རྣམས་བཞུད་ཤུལ་ན་ང་ཚོ་མྱ་ངན་ལྕི་ཡང་།
གདུང་འབོད་ཀྱི་མིག་ཆུ་མི་འབྱིན་ལ།
ཐབས་ཟད་ཀྱི་སྣང་བ་མི་འཁྱེར།
ཁྱེད་ཅག་གི་དོན་དུ།
རང་རིགས་ཀྱི་སླད་དུ།
མ་ཎྀའི་དབྱངས་རྟ་དྲོན་མོ་ཁྱེད་ཀྱི་གམ་ལ་འཕུར་ཡོད།
ཨྃྃ༌མ་ཎྀ་པདྨ་མེ་ཧཱྃ༔

༢༠༡༠ ༤ ༡༧