མཆོད་མེ་ཀོང་བུ་གང་ལས་མེད་ཀྱང༌།

ས་ཡོམ་གྱི་གོད་ཆག་ཐེབས་པའི་ཕ་ཡུལ་གྱི་སྤུན་ཟླ་ཚོར།
སྐྱ་མདའ།

ས་ཁམས་འདི་ལས་ཡངས་ཤིང༌།
རི་རབ་སྟོང་གིས་ཀྱང་མི་ཁོག་པའི་མིག་ཆུ་ལྷུང་ལྷུང་དུ་ བཞུར་གྱིན།
འདར་སིག་སིག་གི་ལག་ཟུང་འདི་སྒུལ་བཞིན།
ངའི་ཕ་ཡུལ་གྱི་གོད་ཆག་དེའི་སླད་དུ།
མིག་ཆུ་དང་ལྷན་དུ་གྱེར་བའི་སྙན་ངག་གི་མཆོད་འབུལ་འདེབས་ ཀྱིན་ཡོད།

སྤུན་ཟླ་ཚོ། ས་འདི་ནས་ཀྱང་བྲེལ་བྲེལ་ཟིང་ཟིང་གིས།
ཡར་ལྷ་རུ་མཆོད་པ་དང༌། མར་ངན་སློང་ལ་སྦྱིན་པ་གཏོང་གིན།
རྣམ་ཤེས་དང་སེམས་ནུས་ཡོད་དགུ།
རྒྱང་རིང་གི་ཕ་ཡུལ་དུ་བཞུད་ཀྱིན་འདུག
ཕ་ཡུལ་གྱི་རི་བྲག་འདིལྟར་ཉིལ་དུས།
སུ་ཞིག་གིས་བཟོད་པར་ནུས།
ཕ་ཡུལ་གྱི་མཚོ་མོ་འདི་ལྟར་སྐེམ་དུས།
ངའི་དབང་རྩའི་རྡུལ་ཕྲན་རེ་རེ་ནས་སིལ་བུར་འཐོར་གྱིན་ ཡོད།

ངའི་ཕ་ཡུལ་གྱི་གློ་སྙིང་ལ་ཁབ་བཙག་གིས་མ་འབིགས་རོགས།
ཞི་བདེ་དང་ཁོར་ཡུག་དེའི་ཆེད་དུ།
ངའི་ཕ་ཡུལ་གྱི་ལུས་ཁམས་ལ།
ཁྲག་དམར་གྱིས་སྦགས་པའི་སོར་མོས་མ་འབྲད་རོགས།
ཉམ་ཆུང་གི་སྤུན་ཟླ་རྣམས་ཀྱི་ཆེད་དུ།
གནས་མཆོག་འདི་ནི།
སེམས་པ་ཁྲི་སྟོང་མང་པོའི་འཚོ་གནས་དང་རེ་ལྟོས་བཅའ་ས་ཡིན།

༢༠༡༠ ༤ ༡༦